Abadepite bo mu ntara ya Nord-Ubangi mu majyaruguru ashyira uburengerazuba bwa Repubulika ya Demokarasi ya Congo batoye birukana Guverineri Malo Ndimba Mobutu w’iyo ntara, nkuko ibitangazamakuru byo muri icyo gihugu bibitangaza.
Malo Mobutu, w’imyaka 41, ni umwuzukuru wa Maréchal Mobutu Sese Seko wategetse Zaïre (DR Congo y’ubu) imyaka 32 kugeza mu mwaka wa 1997, ubwo yahirikwaga n’inyeshyamba ziyobowe na Laurent-Désiré Kabila zifashijwe n’u Rwanda na Uganda.
Ibitangazamakuru byo muri DR Congo birimo na Radio Okapi y’Umuryango w’Abibumbye, bitangaza ko Malo Mobutu yirukanwe mumatora ku kumutakariza icyizere ryabaye ku wa gatandatu mu nteko ishingamategeko y’intara ya Nord-Ubangi.
Igitangazamakuru RTNC cya leta ya DR Congo cyavuze ko Malo Mobutu yatakarijwe icyizere ku bwiganze bw’abadepite 10 kuri 18 bagize inteko ishingamategeko y’iyo ntara.
📰 Also Read This:
Amakuru avuga ko abo badepite bamushinja ibyaha birimo imicungire mibi y’imari no kunyereza amwe mu mafaranga agenewe ibikorwa rusange by’abaturage muri iyo ntara.
Malo Mobutu nta cyo yari yatangaza ku mugaragaro kuri icyo cyemezo no kuri ibyo ashinjwa. Bivugwa ko atari ari muri iryo tora.
BBC Gahuzamiryango yagerageje kuvugana na Malo Mobutu n’umwe mu badepite b’intara ya Nord-Ubangi, kugeza ubu ntibirashoboka.
Umwe mu badepite bo mu nteko ishingamategeko yo mu ntara ya Kivu ya Ruguru yabwiye BBC Gahuzamiryango ko iyo abadepite batoye ku bwiganze bagatakariza icyizere Guverineri, “aba agiye we na guverinoma ye yose”.
Ariko uwo mudepite yavuze ko hari ubwo ubutegetsi bw’i Kinshasa, nka minisiteri y’ubutegetsi bw’igihugu, bwitambika icyemezo cy’abadepite b’intara bukaba bwasubizaho Guverineri “ku gahato”.
Malo Mobutu yari yatowe muri Nyakanga (7) mu mwaka ushize nka Guverineri w’intara ya Nord-Ubangi avukamo.
Mbere yaho yabaye umujyanama muri minisiteri ishinzwe imyubakire muri icyo gihugu.
