Mu gitondo cyo ku wa kabiri tariki ya 16 Ukuboza 2025, ijwi rikomeye ryongeye kugaruka ku bibazo by’umutekano n’uburenganzira bwa muntu mu burasirazuba bwa Repubulika ya Demokarasi ya Congo.
Obadioas Kavune, umunyabwenge n’Umunyamulenge uzwiho kugaragaza ibitekerezo byimbitse ku mateka n’akarengane karanze ubuzima bw’Abatutsi bo muri Congo, yatanze ubutumwa bukomeye abinyujije kuri MCN, abugenera amahanga n’imiryango mpuzamahanga.
Mu magambo arimo intimba n’uburakari, Kavune yabajije ikibazo gikomeye gikomeje kwibazwa na benshi: “Ese Abatutsi bo muri Congo baremewe gupfa?” Iki kibazo ntiyagitanze nk’ikirimo amarangamutima gusa, ahubwo yagishingiye ku mateka maremare y’ubwicanyi, itotezwa n’ihohoterwa byagiye bikorwa ku Batutsi mu bihe bitandukanye, amahanga akenshi akabirebera cyangwa akabyirengagiza.
Kavune yagaragaje ko mu gihe isi ikomeza kwigira umuvugizi w’uburenganzira bwa muntu, hari abaturage bamwe bagaragaye nk’abadakorwaho, naho abandi bakemererwa gupfa ntawe ubavugiye. Yavuze ko guceceka kw’amahanga ku bikorerwa Abatutsi bo muri Congo atari impanuka, ahubwo ari ihitamo rishingiye ku nyungu za politiki n’ubukungu.
📰 Also Read This:
Agaruka ku mateka ya kera, Kavune yibukije ko mu 1964, mu mvururu zari ziyobowe na Pierre Mulele, Abatutsi benshi bo muri Congo bishwe, barasahurwa, abagore bafatwa ku ngufu, imiryango irasenywa, byose bikabera mu maso y’isi itigeze igira icyo ibikoraho. Ibyo byabaye intangiriro y’urugendo rurerure rw’amarira n’ubwoba.
Yongeyeho ko mu bihe byakurikiyeho, Mobutu Sese Seko, mu gushaka kongera gutegeka igihugu, yiyambaje Abatutsi mu ntambara zamufashije gusubira ku butegetsi. Ariko, nk’uko Kavune abivuga, ubwo Mobutu yari amaze gukomera, abo Batutsi bahise bongera kwirukanwa mu byabo, uburenganzira bwabo burahonyorwa, amahanga nabwo araceceka.
Kavune yagarutse cyane ku mwaka wa 1996, aho yavuze ko Abatutsi bo muri Congo bahawe amasaha make yo kuba bamaze kuva ku butaka bwabo. Ibyo byakurikiwe n’ubwicanyi ndengakamere, isahurwa n’itwikwa ry’imihana, mu gihe abaturage b’abasivili bahungaga mu mashyamba no mu misozi nta kirengera.
Mu 1998, ubwo intambara yari yongeye gufata indi ntera, Kavune yavuze ko Abatutsi bakomeje kwicirwa ahantu hatandukanye mu gihugu, harimo Kinshasa, Lubumbashi, Kalemie n’ahandi henshi. Abantu bicwaga ku manywa y’ihangu, bazira ubwoko bwabo gusa, amahanga akabyirebera nk’aho bitabaye.
Yagize ati: “Mu bihe byose Abatutsi bapfaga, amahanga yari acecetse. Ndetse no mu 1994 mu Rwanda, Abatutsi barishwe isi irebera.”
Aya magambo ye yashimangiye ko ikibazo atari icya Congo gusa, ahubwo ari indwara y’isi yo guhitamo abo irengera n’abo ireka bakicwa.
Kavune yanibukije ko kuva mu 2017 kugeza ubu, Abatutsi bo mu burasirazuba bwa Congo, by’umwihariko Abanyamulenge, bakomeje kwibasirwa n’imitwe yitwaje intwaro. Imidugudu yabo yarasenywe, imiryango irameneshwa, inka ziricwa, abaturage baricwa cyangwa bakirukanwa ku butaka bwabo, mu gihe bamwe bari batangiye gusubira mu byabo bizeye amahoro.
Yagaragaje ko mu myaka irenga umunani, Abanyamulenge babayeho nk’abafunzwe mu gihugu cyabo, bahora mu bwoba bw’ibitero by’indege n’ibisasu biremereye byo mu kirere, nyamara ibi byose ntibyigeze bituma amahanga asakuza cyangwa afata ingamba zikomeye.
Mu buryo butunguranye, Kavune yagarutse ku gikorwa cya gisirikare cyabereye i Uvira, avuga ko cyahise gitera amahanga gusakuza no kuvuga cyane, nyamara mu by’ukuri cyari igisubizo ku bantu bari bamaze igihe bafungiwe mu Minembwe, bamburwa ubwisanzure n’uburenganzira bwo kubaho.
Yibajije impamvu ubwisanzure bw’Abanyamulenge bwabaye icyaha ku isi, mu gihe kubica no kubirukana mu byabo byari byaramenyerewe nk’aho ari ibisanzwe. Ibi yabihuje n’amagambo ya Perezida wa Repubulika y’u Rwanda, Paul Kagame, wavuze ko abasakuza ku byabereye i Uvira batigeze bagira ijwi ku mibabaro Abanyamulenge bamaze igihe kinini banyuramo.
Kavune yanagarutse ku byabereye mu ntara ya Ituri, aho yavuze ko amahanga yongeye guceceka ku bwicanyi bwahitanye ubuzima bw’abantu benshi, bigaragaza ko ikibazo atari icy’abantu bake, ahubwo ari icy’ubutabera bubogamye.
Mu gusoza ubutumwa bwe, Obadioas Kavune yasabye amahanga n’imiryango mpuzamahanga guhindura imikorere yayo. Yavuze ko igihe kigeze ngo inyungu za politiki n’ubukungu bireke gushyirwa imbere y’ubuzima bw’abantu.
Yasabye ko abatabazi n’abaharanira amahoro bemererwa gukora akazi kabo mu bwisanzure, hatitawe ku nyungu zihishe, hagamijwe kurengera abasivili bose no kubahiriza uburenganzira bwa muntu nta vangura.
Ubu butumwa bwakiriwe nk’ubuhamya bukomeye bwiyongera ku majwi menshi asaba isi kwisubiraho ku ruhare rwayo mu makimbirane yo mu burasirazuba bwa Congo. Kuri benshi, amagambo ya Kavune ni induru isaba ubutabera, ukuri n’ubwuzuzanye mu kurengera ikiremwamuntu, hatitawe ku bwoko, aho akomoka cyangwa inyungu za politiki.
