Ihuriro rya politiki n’igisirikare Alliance Fleuve Congo (AFC/M23) ryasohoye itangazo ryihutirwa rivuga ko rifite impungenge zikomeye ku mutekano muke ukomeje gufata intera mu bice bya Minembwe, Mikenge na Karingi muri Kivu y’Amajyepfo.
Mu itangazo ryasinywe i Goma na Lawrence Kanyuka, Umuyobozi w’Ishami rishinzwe Itumanaho muri AFC/M23, iri huriro rivuga ko abasivili bakomeje kwicwa mu buryo bwa kinyamaswa n’ihuriro ry’ingabo za Leta ya Kinshasa n’imitwe iyishyigikiye.
AFC/M23 ishimangira ko ibikorwa by’ihohoterwa rikorerwa abaturage b’inzirakarengane,by’umwihariko abagore, abana n’abasaza,bikorwa n’ihuriro rigizwe n’ingabo za Leta ya RDC rifatanyije n’imitwe nka Wazalendo, FDLR n’abacanshuro b’abanyamahanga.
AFC/M23 ivuga ko ibi bikorwa by’ubwicanyi n’ihohoterwa rikabije bikomeje gukorwa ku mugaragaro, mu gihe umuryango mpuzamahanga, imiryango iharanira uburenganzira bwa muntu n’inzego z’ubutabazi bikomeje guceceka cyangwa kugaragaza kudafata ingamba zifatika, nubwo ibyo bikorwa bigize ihohoterwa rikomeye ry’amategeko mpuzamahanga arengera ikiremwamuntu (Droit International Humanitaire).
AFC/M23 ishinja ubutegetsi bwa Kinshasa gukomeza ibikorwa bya gisirikare binyuranyije n’amasezerano yo guhagarika imirwano yashyiriweho umukono mu biganiro byabereye i Doha na Washington, bikaba bishobora gutesha agaciro inzira y’amahoro yari itangiye gutanga icyizere ku baturage.
Mu gusoza, iri huriro ryasabye ibihugu byo mu karere, imiryango mpuzamahanga n’inzego z’ubutabera mpuzamahanga guhagurukira rimwe, hagashyirwaho ingamba zo guhagarika ihohoterwa rikorerwa abasivili no gukurikirana abakekwaho ibyaha. Rivuga ko gukomeza guceceka bizatuma amateka azabaza buri wese wagize uruhare mu kudahana abakoze aya mahano.
Ku ruhande rwa Leta ya Kinshasa, kugeza ubu nta cyo iratangaza ku byavuzwe na AFC/M23.
