Mu byumweru bibiri bishize, inkambi z’impunzi zo mu gihugu cy’u Burundi zahindutse ahantu h’akababaro gakomeye, aho Abanye-Congo barenga 100 bamaze kuhagwa bazize ubuzima bubi, inzara, indwara n’umutekano muke.
Iyi mibare ikomeje guteza impungenge imiryango iharanira amahoro n’uburenganzira bwa muntu, mu gihe ubuyobozi bw’u Burundi n’abafatanyabikorwa mpuzamahanga basabwa gufata ingamba zihutirwa.
Amakuru y’izi mpfu yemejwe n’umuryango witwa Organisation citoyenne pour la paix et la cohabitation communautaire (CPCC), washyize hanze raporo igaragaza ko nibura abantu 105 bamaze gupfa mu nkambi zitandukanye mu gihe gito cyane.
Umuyobozi wa Komite Nshingwabikorwa w’uyu muryango, Ahadi Bya Masu, yavuze ko impfu zatewe ahanini n’ibura rikomeye ry’ibyangombwa by’ibanze bikenewe mu bihe by’ubutabazi.
Yagize ati: “Ibibera mu nkambi z’impunzi mu Burundi biteye agahinda. Abantu baragenda bapfa umunsi ku wundi bazira kubura aho kuba hahagije, kubura serivisi z’ubuvuzi zinoze, no kutabona ibiribwa bihagije. Ibi ni ibintu bidakwiriye ikiremwamuntu.”
Raporo ya CPCC igaragaza ko inkambi nyinshi zakiriye impunzi zirenze ubushobozi bwazo, bigatuma abantu baryama hasi cyangwa mu mahema adashoboye kubarinda imbeho n’indwara. Abana, abagore batwite n’abageze mu zabukuru ni bo bibasiwe cyane n’iki kibazo, aho indwara ziterwa n’umwanda, imirire mibi n’umwuma bikomeje kwiyongera.
Uretse ibibazo by’ubuzima, umutekano w’izi mpunzi na wo uri mu kaga. CPCC ivuga ko hari impunzi zagabweho ibitero n’abantu bitwaje imyambi n’intwaro gakondo, ibintu byatumye bamwe bahasiga ubuzima abandi bagakomereka bikomeye. Ibi byiyongera ku ihungabana izi mpunzi zisanganywe nyuma yo guhunga imirwano ikomeye mu burasirazuba bwa Repubulika Iharanira Demokarasi ya Congo.
Izi mpunzi zatangiye kwambuka zijya mu Burundi cyane cyane guhera tariki ya 5 Ukuboza 2025, ziturutse mu bice bya Uvira n’inkengero zaho, nyuma y’imirwano yahanganishije Ingabo za Leta ya Congo (FARDC) n’abarwanyi b’ihuriro AFC/M23. Nyuma y’aho AFC/M23 ifashe umujyi wa Uvira, impunzi zahise ziyongera ku bwinshi, bituma u Burundi bwakira umubare munini butari bwiteguye.
Nubwo ubuyobozi bw’u Burundi bwatangaje ko bwakiriye impunzi nyinshi, imibare y’Ishami rya Loni ryita ku Mpunzi (UNHCR) igaragaza ko impunzi z’Abanye-Congo ziri muri iki gihugu zirenga 101,000. Benshi muri bo bacumbikiwe mu ntara za Cibitoke na Bubanza, aho ibikorwaremezo by’ubutabazi bidahagije.
Minisiteri y’Umutekano mu Burundi yemeye ko igihugu cyatunguwe n’uyu mubare munini w’impunzi, isohora itangazo mu Ukuboza 2025 isaba imiryango mpuzamahanga n’abaterankunga gutabara byihuse. Icyakora, n’ubwo hari ubufasha buke bwatangiye kuhagera, imibereho y’impunzi iracyari mibi cyane.
Ikindi kibazo gikomeye ni uko izi mpunzi zidafite icyizere cyo gusubira mu gihugu cyazo vuba. U Burundi bwafunze imipaka ibuhuza na RDC, cyane cyane ku mipaka ya Gatumba na Vugizo, buvuga ko izafungurwa gusa igihe umutekano uzaba wagarutse mu buryo budateye impungenge.
Ku rundi ruhande, ihuriro AFC/M23 rishinja Leta y’u Burundi gukoresha imbaraga ku mpunzi zigerageza gusubira iwabo. Aya makimbirane yatumye bamwe mu mpunzi bahisemo gufata inzira zitemewe, bambuka uruzi rwa Ruzizi mu buryo buteye ubwoba, bakoresheje imajerekani n’ibikoresho bidatekanye.
Amashusho akomeje gukwirakwira ku mbuga nkoranyambaga agaragaza abagabo, abagore n’abana bambuka amazi y’uruzi rwa Ruzizi mu kaga gakomeye, ari ishusho igaragaza neza uburemere bw’iki kibazo cy’ubutabazi. Abasesenguzi bavuga ko ibi byerekana kunanirwa kw’akarere n’umuryango mpuzamahanga gukemura ikibazo cy’impunzi mu buryo burambye.
Ahadi Bya Masu asaba Guverinoma ya Repubulika Iharanira Demokarasi ya Congo, u Burundi n’abafatanyabikorwa mpuzamahanga kwihutira gushyira hamwe, bagatanga ubufasha bwihuse kandi burambye, bwibanda ku buzima, ibiribwa, umutekano n’icyerekezo cy’ejo hazaza h’izi mpunzi.
