Mu gihe ikibazo cy’iyubahirizwa ry’uburenganzira bwa muntu gikomeje kuba ingorabahizi muri Repubulika Iharanira Demokarasi ya Congo, uwahoze ari Minisitiri w’Uburenganzira bwa Muntu, Marie-Ange Mushobekwa, yagaragaye ku mugaragaro ashinja inzego z’ubutasi gukora ibyaha bikomeye birimo ishimutwa n’iyicarubozo byakorewe abana be babiri bato.
Mu kiganiro n’abanyamakuru cyabereye i Kinshasa kuri uyu wa Kane, Mushobekwa yatangaje ko abana be, Claudien na Christopher Likulia, bafite imyaka 18 na 17, bashimuswe mu buryo bunyuranyije n’amategeko, bakorerwa iyicarubozo rikabije n’abantu bivugwa ko bakorera Ikigo cy’Igihugu gishinzwe Iperereza (ANR).
Nk’uko abyivugira, ibi byabaye mu ijoro ryo ku wa 21 Ukuboza 2025, mu rugo rwa Philémon Mambabwa, uvugwa nk’umukozi mukuru muri ANR. Mushobekwa avuga ko abana be bari kumwe n’inshuti yabo y’imyaka 17, maze bafatwa n’abantu barindwi barimo abapolisi n’abasirikare, bakabohwa, bagakubitwa bikabije, ndetse bakorerwa iyicarubozo rishobora kugereranywa n’irikorwa mu bihe by’intambara.
Yagize ati: “Ibi ni icyemezo cyafashwe mu buryo butemewe n’amategeko, kirimo ubugome bukabije kandi butari bukwiriye Leta yiyita iyubahiriza uburenganzira bwa muntu.”
Uyu wahoze ari Minisitiri ashimangira ko abana be bakubiswe kugeza bataye ubwenge, bakagira ibikomere bigaragara ku mubiri, kugorwa no kwicara, ndetse umwe muri bo akaba yaragizwe ikimuga cy’igihe gito ku kuboko kw’iburyo. Uretse ibikomere by’umubiri, Mushobekwa avuga ko abo bana bagize ihungabana rikomeye ryo mu mutwe.
Yamaganye bikomeye icyo yise “gukoresha nabi ububasha bwa Leta” n’“ikibazo gikomeye cy’imiyoborere,” agaragaza ko kuba hashize ibyumweru birenga bitatu nta muntu n’umwe urabibazwa, bigaragaza intege nke z’inzego z’igihugu zirimo Minisiteri y’Ubutabera n’iy’Umutekano.
Nubwo yemeza ko dosiye yafunguwe, Mushobekwa avuga ko iperereza rigenda biguruntege, mu gihe amategeko ya Congo n’amasezerano mpuzamahanga igihugu cyashyizeho umukono abuza iyicarubozo mu bihe byose, hatitawe ku mimerere y’igihugu.
Yasabye ko ubutabera buboneye butangwa, asaba ko n’ubushinjacyaha bwa gisirikare bwagira uruhare muri dosiye, kubera ko abakekwaho ibyaha ari abantu bambaye impuzankano zacyo. Yongeraho ko nubwo afite impungenge, akomeje kugirira icyizere ubutabera bwa Congo.
Mu ijambo rifite uburemere bwinshi, Mushobekwa yahamagariye abayobozi b’igihugu gufata inshingano zabo, agira ati: “Iki si ikibazo cya politiki. Ni ikizamini cy’imyitwarire n’indangagaciro za Leta.”
Marie-Ange Mushobekwa, uzwi kandi ku izina rya Likulia, yavukiye i Bukavu ku wa 19 Ukuboza 1973. Yatangiye ari umunyamakuru mbere yo kwinjira muri politiki, aba Minisitiri w’Uburenganzira bwa Muntu kuva mu 2016 kugeza mu 2019 ku butegetsi bwa Joseph Kabila. Nyuma y’itorwa ritavugwaho rumwe rya Perezida Félix Tshisekedi, yagizwe Minisitiri w’Itumanaho n’Umuvugizi wa Guverinoma.
Nyuma y’ishyirwaho rya Guverinoma ya Ilunga muri Nzeri 2019, yasimbuwe ku mwanya wa Minisitiri w’Uburenganzira bwa Muntu na André Lite, mu gihe umwanya we w’Itumanaho wasigiwe Jolino Makelele. Mushobekwa yagiye avuga ko yanyuzwe n’akazi yakoze muri Guverinoma.
Ku ruhande rwa politiki, yahuye n’imbogamizi mu matora y’abadepite yo mu 2018 muri Teritwari ya Kabare, ariko aza kubona umwanya mu Nteko Ishinga Amategeko nyuma y’aho itorwa rya Faustin Kaningu riteshejwe agaciro n’Urukiko rushinzwe kurengera Itegeko Nshinga. Icyo cyemezo cyakurikiwe n’imyigaragambyo ikomeye muri Kabare, Mushobekwa yise imyigaragambyo y’urubyiruko rwashegeshwe n’ibiyobyabwenge n’ubushomeri.
Uwahoze ari umuyoboke w’ishyaka UDPS riri ku butegetsi, Mushobekwa yaje gutandukana naryo mu Mutarama 2021, ajya mu ruhande rutavuga rumwe n’ubutegetsi. Ishyaka rye, Mouvement pour la Cohésion Nationale (MCN), ryaje kwinjira mu ihuriro FCC rya Joseph Kabila.
Iki kibazo cy’abana be kivugwa nk’ikindi kimenyetso cyongera gutuma habaho impaka zikomeye ku mikorere y’inzego z’umutekano muri RDC, ndetse kikaba gishobora kugerageza ubushake buke bwa Leta mu kurengera uburenganzira bwa muntu no kubahiriza amategeko y’igihugu n’ay’isi yose.
