Perezida wa Burkina Faso, Kapiteni Ibrahim Traoré, yatangaje ko ateganya kugirana ikiganiro na Perezida w’u Burundi, Evariste Ndayishimiye, agamije gusobanukirwa neza impamvu igihugu cye cyahagaritswe mu muryango wa Afurika Yunze Ubumwe (AU), ndetse n’ingaruka z’icyo cyemezo ku hazaza h’imikoranire ya dipolomasi mu karere.
Tariki ya 31 Mutarama 2022, AU yafashe icyemezo cyo guhagarika Burkina Faso mu bikorwa byayo byose, nyuma y’ihirikwa ry’ubutegetsi rya Roch Marc Christian Kaboré ryakozwe n’ingabo zari ziyobowe na Kapiteni Traoré. Uwo muryango wasobanuye ko Burkina Faso izasubizwa mu bikorwa byawo ari uko izaba yasubijeho ubutegetsi bushingiye kuri demokarasi binyuze mu matora rusange.
Mu rwego rwo gushakira ibisubizo ibibazo by’umutekano muke n’ihungabana rya politiki mu karere ka Sahel, tariki ya 17 Nyakanga 2025, AU yagize Perezida Evariste Ndayishimiye intumwa yayo yihariye muri ako karere. Yahawe inshingano zo kuganira n’abayobozi ba Burkina Faso, Mali na Niger, hamwe n’imiryango yo mu karere, sosiyete sivile n’abandi bafatanyabikorwa, hagamijwe gushakira hamwe amahoro n’umutekano birambye binyuze mu nzira za dipolomasi.
📰 Also Read This:
Mu kiganiro n’abanyamakuru, Kapiteni Traoré yavuze ko kugeza ubu ataramenyeshwa impamvu zifatika zatumye AU ifata icyemezo cyo guhagarika Burkina Faso, anagaragaza ko atazi neza niba igihugu cye kigifatwa nk’umunyamuryango wuzuye w’uwo muryango. Yavuze ko abayobozi ba AU bataramuha ibisobanuro bihagije ku cyemezo cyafashwe.Yagize ati: “Twari twitezwe kwakira Perezida w’u Burundi mu cyumweru gishize, ariko urugendo rurasubikwa kubera gahunda nyinshi. Turamuteze. Dushaka kumva impamvu badufashe gutya n’impamvu baduheje.”
Kapiteni Traoré yanabajijwe niba Burkina Faso itekereza kuva muri AU nk’uko yabigenje mu muryango wa CEDEAO, aho Burkina Faso, Mali na Niger byahisemo gushinga ihuriro rishya ry’umutekano n’ubufatanye rizwi nka AES. Yasubije ko icyo cyemezo kizashingira ku bisobanuro azahabwa na Perezida Ndayishimiye.Ati: “Ntitwafata icyemezo gikomeye tutabanje kumenya impamvu. Kubera iki baduheje? Kubera iki badufata batyo? Niduhabwa ibisobanuro, ni bwo twasobanurira abaturage bacu impamvu twafashe icyemezo runaka, nk’uko byagenze igihe twavaga muri CEDEAO.”
Mu 2024, Leta y’inzibacyuho ya Burkina Faso yemereye Kapiteni Ibrahim Traoré gukomeza kuyobora igihugu kugeza mu 2029, icyemezo cyateje impungenge muri AU, kuko uwo muryango wagaragaje ko wifuza ko amatora rusange yaba mbere y’uwo mwaka.
Iki kiganiro gitegerejwe hagati ya Kapiteni Ibrahim Traoré na Perezida Evariste Ndayishimiye gishobora kuba intambwe ikomeye mu gusobanura umubano wa Burkina Faso na AU, kikagira n’uruhare runini mu kugena icyerekezo cy’igihe kizaza cy’imiyoborere n’imikoranire ya dipolomasi mu karere ka Sahel.
