Mu minsi mike mbere y’uko hatangira Igikombe cy’Afurika cy’umupira w’amaguru (CAN 2025), kizabera muri Maroc kuva ku wa 21 Ukuboza 2025 kugeza ku wa 23 Mutarama 2026, Perezida wa Repubulika Iharanira Demokarasi ya Congo, Félix Tshisekedi, yoherereje ubutumwa bukomeye bw’ihumure n’ihumuro abakinnyi b’ikipe y’igihugu, Léopards.
Nk’uko byatangajwe mu myanzuro y’Inama ya 70 y’Abaminisitiri, yasomwe ku wa Gatanu tariki ya 12 Ukuboza kuri Televiziyo y’Igihugu na Minisitiri w’Itangazamakuru n’Itumanaho, Patrick Muyaya, Umukuru w’Igihugu yasabye abakinnyi “kurushaho kwitanga, gukina bagaragaza ubuhanga, umurava n’inshingano yo kurwanira igihugu.”
📰 Also Read This:
Perezida Tshisekedi yibukije Léopards ko Guverinoma n’Abanye-Congo bose bari inyuma yabo, babashyigikiye byimazeyo. Yagaragaje ko umusaruro wabo utagarukira ku kibuga gusa, ahubwo ugaragaza ishema, ubumwe n’icyizere by’igihugu cyose.
Patrick Muyaya yagize ati: “Perezida wa Repubulika yoherereje abakinnyi bacu ubutumwa bw’inkunga bushingiye ku rukundo rw’igihugu, abasaba kwitwara neza, gukina bafite ubuhanga, umutima wo kwitanga n’inshingano zo guhesha igihugu ishema. Guverinoma n’abaturage bose babari inyuma mu buryo budasubirwaho.”
Ubu butumwa buje bukurikira izindi ntambwe Perezida Tshisekedi aherutse gutera zo gushyigikira Léopards, aho yigeze kuvuga ko iyi kipe “ishobora gukora ibirenze ibyakozwe mu 1974,” yerekeza ku mateka akomeye ya RDC mu mupira w’amaguru, cyane cyane ku kwitabira Igikombe cy’Isi icyo gihe. Ku bwe, umupira w’amaguru ni igikoresho gikomeye cyo guhuza Abanye-Congo no kuzamura isura y’igihugu ku rwego mpuzamahanga.
Tariki ya 8 Ukuboza, imbere y’Inteko Ishinga Amategeko, Perezida yongeye kugaragaza icyizere cy’uko RDC iri hafi kugera ku mateka mashya yo kwitabira Igikombe cy’Isi cya 2026, avuga ko “hasigaye iminota 90 gusa ngo igihugu cyandike amateka.”
Mu gihe CAN 2025 izahuza amakipe akomeye nka Sénégal, Maroc na Nigeria, Léopards basabwa gufata ubu butumwa bwa Perezida nk’umusingi wo kwandika urupapuro rushya mu mateka yabo. Inkunga y’Umukuru w’Igihugu n’iy’abaturage bose ishobora kuba imbarutso yo gutuma RDC igaruka ku mwanya ikwiye ku ruhando rwa ruhago nyafurika.
RDC ifite amateka akomeye mu mupira w’amaguru wa Afurika, aho yegukanye Igikombe cya Afurika inshuro ebyiri mu 1968 no mu 1974.
