Ubuyobozi bukuru bw’Igisirikare cya Repubulika Iharanira Demokarasi ya Congo (FARDC) bwatangaje ku mugaragaro ko butemera kandi bwamaganye amagambo yavuzwe n’Umuvugizi wa FARDC, Maj. Gen. Sylvain Ekenge, yibasira Abatutsi, yatangarijwe kuri Radio na Televiziyo by’Igihugu (RTNC) ku wa Gatandatu tariki ya 27 Ukuboza.
Mu itangazo ryashyizwe ahagaragara n’igisirikare, ryashyizweho umukono n’Umugaba Mukuru w’Ingabo za FARDC, Lt. Gen. Banza Mwilambwe Jules, ubuyobozi bw’igisirikare bwemeje ko ibyatangajwe na Maj. Gen. Ekenge bitagaragaza na gato umurongo wa Leta ya Repubulika Iharanira Demokarasi ya Congo, Umugaba w’Ikirenga w’Ingabo ari we Perezida Félix Antoine Tshisekedi Tshilombo, cyangwa Guverinoma muri rusange.
Iryo tangazo rikomeza risobanura ko FARDC yiyemeje gukorera igihugu mu buryo bwa kinyamwuga, muri disipuline no mu kubahiriza amahame agenga igisirikare cya Repubulika, aho kurinda Abanyekongo bose bikorwa nta vangura iryo ari ryo ryose, haba irishingiye ku bwoko, inkomoko, idini cyangwa ibitekerezo bya politiki.
Ku wa Gatandatu ushize, Maj. Gen. Sylvain Ekenge yari yatangaje amagambo kuri RTNC avuga ku mibanire ishingiye ku bashakanye, aho yakomoje ku bashyingiranywe n’Abatutsi, amagambo yafashwe n’abantu benshi nk’atesha agaciro itsinda ry’abantu kandi akabiba urwango n’amacakubiri.
Yagize ati: “Iyo ushyingiranywe n’umugore w’umututsi, ugomba kwitonda. Iyo uri mu mwanya w’ubutegetsi, nk’umutware gakondo wo mu rwego rwo hejuru, uhabwa umugore, ariko uzakira umwe mu bagize umuryango we mu rugo rwawe, ukerekanwa nka mubyara cyangwa mwishywa we, mu gihe uyu ari we muntu uzabyarana abana n’umugore wawe mu rugo, kandi uzabwirwa ko abana bavuka ari Abatutsi kubera ko ubwoko bw’Abatutsi buri hejuru y’ubwoko bwabo.”
Aya magambo yahise akwirakwira cyane ku mbuga nkoranyambaga no mu bitangazamakuru bitandukanye, atungura abatari bake, atuma imiryango iharanira uburenganzira bwa muntu, abanyapolitiki, abanyamakuru n’abaturage basanzwe bayamagana bikomeye.
Mu gihe igitutu cyari kimaze gufata intera, amakuru atandukanye yemeje ko Perezida Félix Tshisekedi yahise afata icyemezo cyo gukura Maj. Gen. Sylvain Ekenge ku nshingano ze zo kuvugira Ingabo za FARDC, hagamijwe gukumira ikwirakwira ry’imvugo zibiba urwango no kurinda isura y’igihugu n’igisirikare.
Nubwo itangazo rya FARDC ridashyira mu magambo arambuye ingaruka z’ayo magambo ku rwego mpuzamahanga, abasesenguzi bemeza ko iki cyemezo cyafashwe mu rwego rwo kwirinda ko Congo ikomeza gushinjwa kudahana imvugo zibiba urwango, cyane cyane mu bihe igihugu kirimo intambara n’ubwumvikane buke mu burasirazuba bwacyo.
Mu butumwa bwayo, FARDC yahamagariye Abanyekongo bose kugira ubumwe, gufatanya no kwamagana imvugo zose zibiba urwango n’amacakubiri, igashimangira ko izi mvugo zigira ingaruka mbi ku mutekano w’igihugu, ku bufatanye bw’abaturage n’igisirikare, no ku rugamba rwo guhangana n’imitwe yitwaje intwaro.
Ubuyobozi bw’igisirikare bwavuze ko ubumwe bw’Abanyekongo ari bwo shingiro ry’intsinzi mu kurinda igihugu, kandi ko nta mwanya uhari wo kwihanganira amagambo ashobora gusenya iyo nkingi.
Iki kibazo gikomeje kuba isomo rikomeye ku buyobozi bwa Congo, cyane cyane ku ruhare rw’abayobozi bakuru mu kwitwararika amagambo bavuga mu ruhame, cyane iyo babivugiye ku bitangazamakuru.
Abasesenguzi bemeza ko gukura Maj. Gen. Ekenge ku mwanya we ari intambwe ikomeye, ariko bagasaba ko hakurikiraho ingamba zifatika zo gukumira no guhana imvugo zibiba urwango mu nzego zose z’igihugu, cyane cyane iz’umutekano.
Mu gihe igihugu gikomeje guhura n’ibibazo bikomeye by’umutekano, cyane mu burasirazuba bwa Congo, benshi bemeza ko amahoro, ubumwe n’imiyoborere ishingiye ku kubaha bose ari byo FARDC n’ubuyobozi bwa Leta bikwiye gushyira imbere.
