Umunyamideri akaba n’umunyamuryango w’ibyamamare ku mbuga nkoranyambaga, Gloria Ntazola, yateje impaka zikomeye nyuma yo guha inama abakobwa batarashaka gutwita, abasaba kubanza gusaba abakunzi babo Miliyoni 5 z’amashilingi ya Kenya (Ksh5M) nk’ingwate, mbere yo kwemera gutwita cyangwa gutangira umuryango.
Iyi nama Gloria yayitanze kuri uyu wa Mbere tariki ya 12 Mutarama 2026, mu kiganiro cya Q&A (ibibazo n’ibisubizo) yagiranye n’abamukurikira ku mbuga nkoranyambaga. Ubwo yasubizaga ikibazo cy’umukobwa w’imyaka 24 wamubwiye ko atwite kandi atiteguye kuba umubyeyi, mu gihe umukunzi we yari yemeye gutangira umuryango.
Mu gusubiza, Gloria yagize ati: “Mubwire aguhe Miliyoni 5 nk’ingwate y’ingaruka, igihe cyose yatangira kwitwara nabi.” Yasobanuye ko iyo ngwate yagombye kuba ikimenyetso cy’uko umusore yiteguye inshingano n’ingaruka zo kuba umubyeyi.
Yongeyeho ko nubwo uwo mubare ushobora kugaragara nk’ukabije, igitekerezo nyamukuru ari ugusaba abakunzi kugaragaza ubwitange, uburemere n’inshingano mbere yo gutangira umuryango. Yanagarutse ku kamaro ko umukobwa agira umutekano w’igihe kizaza, abaza ati: “Ese nawe ufite amafaranga yawe?”
Iyi nama yakuruye impaka nyinshi, bamwe bayifata nk’urwenya, abandi bakayibona nk’igitekerezo gikarishye ariko gifite isomo rikomeye. Benshi bemeje ko Gloria yakoresheje umubare munini w’amafaranga mu buryo bwo gushimangira ko gutwita no kubyara bisaba gutekereza neza no kwirinda kwinjira mu buzima bushya utiteguye.
Nk’uko bisanzwe ku mvugo ye, Gloria Ntazola yakoresheje uburyo buvanze ukuri kutaziguye n’urwenya, agaragaza ko umukobwa atagomba kwishingikiriza ku mukunzi gusa, ahubwo akwiye no kwitekerezaho no kugira ubushobozi bwo kwigenga.
