Ibihugu bikomeye ku Isi, Leta Zunze Ubumwe za Amerika, u Bubiligi, u Bufaransa, u Budage, u Bwongereza, u Buholandi, Suwede, u Busuwisi na Danemark,hamwe n’Umuryango w’Ubumwe bw’u Burayi, byasohoye itangazo rikomeye rikubiyemo impungenge zidasanzwe ku mirwano ikomeje kwiyongera mu Burasirazuba bwa Repubulika ya Demokarasi ya Congo (RDC).
Ibi bihugu bibarizwa muri Groupe de Coordination des Opérations (GCO) byasabye ko imirwano ihita ihagarara, cyane cyane mu mujyi wa Uvira muri Kivu y’Amajyepfo, ahari kuberamo ibitero bikaze by’umutwe wa M23, bashimangira ko ushyigikiwe n’u Rwanda.
GCO yihanangirije M23 na RDF, isaba guhagarika imirwano nta busumbane
📰 Also Read This:
Mu itangazo ryo ku wa 09 Ukuboza 2025, GCO yasabye ko:
M23 na RDF bahita bahagarika imirwano, cyane cyane muri Kivu y’Amajyepfo;
RDF ikuramo ingabo muri Congo nk’uko biteganywa n’Icyemezo 2773 cy’Inama y’Umutekano ya LONI, nubwo u Rwanda ruhakana koherezayo ingabo;
Amasezerano ya Washington yo ku wa 04 Ukuboza 2025 yubahirizwa uko yemejwe.
Banagaragaje impungenge ku ikoreshwa ry’indege zitagira umupilote z’intambara (drones), bavuga ko ziri gutuma urugamba rukara no gushyira mu kaga abaturage b’inzirakarengane.
Ibihugu bikomeye bisaba ko abaturage barindwa
GCO yasabye ko impande zose:
Zirinda abasivili;
Zihagarika ibikorwa byose bikaza intambara;
Zireka amagambo ashyushya umurego w’imirwano;
Zifungura inzira z’ubutabazi bwa kimuntu;
Zishyiraho imyanzuro itajegajega yo guhagarika imirwano.
Hashimangiwe ko inzira zose z’ubufasha zigomba gufungurwa kugira ngo imiryango mpuzamahanga ibashe kugera ku baturage bari mu kaga.
Uvira mu bibazo bikomeye, ibihumbu by’ abaturage mu gihirahiro
Ku munsi wabanje, imirwano ikaze yahungabanyije Uvira ku rugero rutari rusanzwe, bituma abaturage barenga 20 000 bahungira mu mujyi wa Bujumbura mu Burundi. FARDC n’abafatanyabikorwa bayo bahunze imirwano, mu gihe M23 ikomeje kwagura uduce iyobora muri Kivu y’Amajyepfo.
Nyuma yo kwigarurira Bukavu n’utundi duce twinshi, AFC/M23 ikomeje kwerekeza i Uvira, umujyi ufatwa nk’umutima wa leta ya Kinshasa muri Kivu y’Amajyepfo. Nubwo nta tangazo rirashyirwaho umukono ribihamya, ibimenyetso byinshi birerekana ko Uvira iri mu maboko y’AFC/M23.
Kinshasa irashinja u Rwanda, abaturage bari mu rujijo
Leta ya RDC ikomeza gushinja:
Ingabo z’u Rwanda (RDF)
AFC/M23
Kutubahiriza amasezerano mashya ya Washington no gukomeza kwagura intara yo mu Burasirazuba.
Ku rundi ruhande, abayobozi b’inzego z’akarere muri Uvira bakomeje guhumuriza abaturage bavuga ko hari ingamba nshya zigamije kwirinda ko umujyi ugwa mu maboko y’inyeshyamba, nubwo ibimenyetso bigaragaza ko imbaraga za FARDC ziri kugenda zicogora.
Impungenge z’akarere ziyongereye
Ibihugu bikomeye ku Isi bikomeje kugaragaza ko iyi ntambara ishobora:
Kwambuka imipaka igakura indi sura,
Guhungabanya u Burundi, u Rwanda n’ibindi bihugu byo mu karere,
Gukoresha intwaro zigezweho zishobora guhindura ishusho y’umutekano mu karere k’Ibiyaga Bigari.
Ibi byose GCO ibifata nk’“ikimenyetso cy’amakuba akomeye ashobora guhungabanya umutekano w’akarere kose” mu gihe nta gikozwe vuba.
Ubutumwa bwa GCO bufatwa nk’igitutu gishya ku mpande zose, mu gihe abaturage bo mu bice bikomeje kwibasirwa n’imirwano aribo bari gukomeza kubihomberamo ku rwego rutigeze rubaho mu myaka ya vuba.
