Mu ijoro ryo ku wa Kabiri, habaye impanuka ikomeye mu gace ka Lugari ku muhanda munini uhuza Eldoret na Webuye, ihitana ubuzima bw’abantu umunani ndetse ikomeretsa abandi batanu bikomeye. Iyo mpanuka yabaye igaragaramo imodoka itwara abagenzi (matatu) yagonganye n’ikamyo nini (trailer) yari ipakiye ifumbire.
Amakuru aturuka ku nzego z’umutekano avuga ko iyo mpanuka yabaye matatu yari irimo kugendera ku muvuduko ukabije yatakaje icyerekezo, igahindukira iva mu murongo wayo, maze igahita igonga trailer yari ihagaze ku ruhande rw’umuhanda. Iyi kamyo ngo yari yahagaze kubera ikibazo cya tekinike.
Umuyobozi wa Polisi mu karere k’iburengerazuba bwa Kenya, Issa Mohamud, yatangaje ko abantu barindwi bahise bapfira aho impanuka yabereye, mu gihe undi umwe yapfiriye mu nzira ajyanwa kwa muganga. Abandi batanu bakomeretse bikomeye bahise bajyanwa mu bitaro bitandukanye kugira ngo bitabweho byihutirwa.
Nyuma y’iyo mpanuka, byatangajwe ko umushoferi wa trailer yahise atoroka, ibintu byakomeje guteza impungenge ndetse bigakurura umujinya mu baturage n’abakoresha umuhanda. Polisi yatangaje ko iperereza ryatangiye kugira ngo hamenyekane aho aherereye kandi ashyikirizwe ubutabera.
Mu gihe inzego z’umutekano n’abatabazi bari bakiri aho impanuka yabereye, bamwe mu baturage bari bateraniye aho batangiye kwikubira ifumbire yari ipakiye muri trailer, ibintu byongeye kugaragaza ikibazo cy’imyitwarire mibi igaragara kenshi mu bihe by’impanuka.
Amafoto n’amashusho byakwirakwiye ku mbuga nkoranyambaga byerekanye matatu yangiritse bikomeye, intebe zavunitse, ibirahuri byamenetse n’amapine yasataguritse, bigaragaza ubukana bw’iyo mpanuka.
Iyi mpanuka ije yiyongera ku zindi nyinshi zimaze iminsi zibera hirya no hino mu gihugu cya Kenya, cyane cyane kuva ukwezi kwa Ukuboza kwatangira. Imibare igaragaza ko abantu barenga 30 bamaze gupfa mu mpanuka zo mu muhanda muri uku kwezi konyine, mu gihe abandi benshi bakomeretse.
Ishami ry’igihugu rishinzwe gutwara abantu n’ibintu mu muhanda (NTSA) ryatangaje ko abantu 4,458 bamaze gupfa mu mpanuka zo mu muhanda hagati ya Mutarama na Ukuboza uyu mwaka, umubare wiyongereyeho abantu 147 ugereranyije n’igihe nk’iki umwaka ushize. Muri iyo mibare, abanyamaguru nibo bagize igice kinini cy’abahitanywe n’impanuka.
Uku kwiyongera kw’impanuka kwabaye intandaro yo gukaza umutekano n’ibikorwa byo kugenzura ibinyabiziga n’abashoferi ku mihanda minini. NTSA ku bufatanye na Polisi (NPS) n’Urwego rw’Ubutabera, batangije ibikorwa bikomeye byo kugenzura umuvuduko, ibyangombwa by’ibinyabiziga n’imyitwarire y’abashoferi, hagamijwe kugabanya impanuka.
Abashoferi basabwe kubahiriza amategeko y’umuhanda, kwirinda umuvuduko ukabije no kwitwararika ubuzima bw’abagenzi batwara. Abanyamaguru nabo basabwe kwitonda, gukoresha inzira zabagenewe no kwirinda kugenda hafi y’imihanda minini cyane cyane mu masaha y’ijoro.
Iyi mpanuka yo muri Lugari yongeye kwibutsa Abanyakenya n’abayobozi ko umutekano wo mu muhanda ukiri ikibazo gikomeye, gisaba uruhare rwa buri wese. Mu gihe iminsi mikuru igenda yegereza, haracyakenewe ingamba zikomeye n’imyitwarire myiza kugira ngo ubuzima bw’abaturage burindwe kandi impanuka zigabanuke.
