Urusaku rukabije rw’imbunda ziremereye n’izoroheje rwumvikanye mu bice bitandukanye bya teritware za Uvira na Fizi, mu burasirazuba bwa Repubulika Iharanira Demokarasi ya Congo, bitera impungenge n’ubwoba ku baturage b’aho.
Nk’uko amakuru abivuga, urwo rusaku rw’intwaro rwatangiye ahagana saa tanu z’ijoro ryakeye rishyira kuri uyu wa Gatandatu, rukomeza kumvikana mu gitondo.
Abaturage batandukanye bavuga ko imirwano yabereye mu misozi ya Katongo, mu misozi iri hejuru y’umujyi wa Uvira, ndetse no mu gace ka Makobola kari muri teritware ya Fizi.
Umwe mu baturage wifuza ko amazina ye atatangazwa, yagize ati:
“Kuva saa tanu z’ijoro kugeza mu gitondo cyo kuri uyu munsi, imbunda ziremereye n’izoroheje zirimo kumvikana mu bice bitandukanye. Abantu benshi barakeka ko ibintu bishobora gukomera, kandi turasaba ko umutekano wagaruka vuba.”
Ibi bibaye nyuma y’igihe kirekire hadakunze kumvikana imirwano muri ibyo bice, nyuma y’uko ihuriro AFC/M23 rifashe umujyi wa Makobola ku munsi wa nyuma w’umwaka wa 2025.
Abaturage benshi bari barasabye ko amahoro asubira mu gace kabo, ariko uko ibintu byifashe kuri ubu bigaragaza ko umutekano wongeye kuzamo agatotsi.
Hari amakuru ataremezwa ku mugaragaro avuga ko ingabo za FARDC, zifatanyije n’abambari bazo, zagabye ibitero ku birindiro bya AFC/M23 mu rwego rwo kugerageza gusubiza ibice byafashwe mu myaka yashize.
Abaturage bavuga ko ubwoba buturuka ku kuba batizeye umutekano, kandi ko benshi bakomeje gusaba ko ingabo za Leta zasubira mu bice byabo hagamijwe gukumira ibitero bishobora kugirira nabi abasivile.
Abashakashatsi n’abasesenguzi mu by’umutekano bo mu ntara ya Kivu y’Amajyepfo basanga iyi mirwano ishobora kuba intandaro y’ingaruka zikomeye mu mibereho y’abaturage, cyane cyane mu gihe amahoro yari amaze igihe atakongera kuboneka.
Mu gihe Leta na FARDC bataratanga ibisobanuro birambuye ku byabaye, abaturage b’aho bavuga ko babaye mu buryo bw’agahinda n’impungenge, bavuga ko bashaka gusa amahoro, kugira ngo basubire mu buzima busanzwe batikanga intambara.
