Mu gitondo cyo kuri uyu wa Gatandatu, imirwano yakomeje hagati y’Umutwe wa M23 n’Ingabo za Leta ya Congo, FARDC, zifatanyije n’abarwanyi ba Wazalendo. Amasasu menshi yumvikanye hafi ya Goma n’i Masisi.
Amakuru avuga ko FARDC yarashe mu birindiro bya M23 ikoresheje indege ya Sukhoï Su-25. Bisanzwe bivugwa ko izi ndege zikoreshwa n’Ingabo za FARDC hamwe n’abacanshuro bafasha iki gihugu muri uru rugamba.
Imirwano yatangiye ahagana saa 6:25 zo mu gitondo. Iri kubera mu bice bya Kibumba, Buhumba (Nyiragongo), Kilorirwe (Masisi) no mu nkengero zaho.
Ku wa Gatanu ni bwo imirwano yari isa n’iyahagaze kuko mu bice bya Masisi, Rutshuru na Nyiragongo hatigeze humvikana amasasu. Ni nyuma y’uko mu minsi yabanje habaye imirwano ikomeye yatumye abaturage bahunga.
Bivugwa ko mu Gace ka Bulengo, ku wa Kane abaturage barenga ibihumbi 10 bavuye mu byabo.
