Itorero 2819 Church riherereye mu mujyi wa Atlanta muri Leta Zunze Ubumwe za Amerika rikomeje kuvugisha benshi kubera umubare munini w’abarikurikirana ku mbuga nkoranyambaga ndetse n’abaryitabira imihango yaryo imbonankubone.
Nk’uko byatangajwe na CNN, buri cyumweru iri torero ryitabirwa n’abantu basaga 6,000, aho bamwe muri bo bagenda amasaha agera kuri 15 baturutse mu bindi bice bya Amerika kugira ngo baryitabire gusenga.
Ku mbuga nkoranyambaga, 2819 Church rifite igikundiro gikomeye kuko rimaze kurebwa n’abantu barenga miliyoni 87 kuri YouTube, rikaba rikurikirwa n’abasaga miliyoni 1.5 nubwo rifite amashusho atageze kuri 500. Ubutumwa bwaryo bugera mu bihugu birenga 50 ku Isi.
Iri torero riyobowe na Pasiteri Phillip Anthony Mitchell, watangaje ko izina 2819 rikomoka ku murongo wo muri Bibiliya wo mu Matayo 28:19, uvuga ku butumwa bwo kujya mu mahanga yose yigishwa ijambo ry’Imana.
Pasiteri Mitchell yavuze ko iri torero ryibanda ku gutanga ubutumwa bw’icyizere n’ihumure, kandi rikakira abantu b’ingeri zose nta vangura.
Abakirisitu baryitabira bagaragaje ko urugendo rurerure bakora ruba rukwiriye. Umwe yagize ati: “Ndabyuka saa cyenda z’ijoro buri cyumweru.” Undi ati: “Gutegereza ku murongo ntacyo bitwaye, biraruhura umutima.”
No ku mbuga nkoranyambaga, benshi bagaragaje ko impamvu ituma abantu bitanga gutyo ari ukwifuza kumva ubutumwa bwa Yesu Kristo, bemeza ko gusenga bifite agaciro kurusha ibindi byinshi bidafite agaciro.
