Abaharanira uburenganzira bwa muntu batandatu bo muri Kenya bafashwe kuri uyu wa Kabiri tariki ya 9 Ukuboza2025, ubwo bari mu gikorwa cyo gusaba Ambasade ya Tanzania gutanga ibisobanuro ku bwicanyi n’ihohoterwa bikomeje kuvugwa muri Tanzania nyuma y’amatora yo mu Kwakira 2025, Samia Suluhu Hassan yatsinze ku majwi menshi (hafi 98%).
Aba baharanira uburenganzira bwa muntu bari bacumbitse imbere ya Ambasade ya Tanzania i Nairobi, basaba ko hakorerwa iperereza ryimbitse ku birego by’uko abaturage benshi bakomeje kwicwa no guhohoterwa kuva tariki ya 29 Ukwakira. Komisiyo y’Uburenganzira bwa Muntu muri Kenya (KHRC) yatangaje ko Perezida William Ruto ari gukingira ikibaba ubutegetsi bwa Suluhu, isaba ko hakorwa ubutabera.
KHRC yagize iti: “Polisi yafashe abaharanira uburenganzira bwa muntu batanu bari baje gusaba Ambasade ya Tanzania ibisobanuro ku bwicanyi n’ihohoterwa bukorwa n’ubutegetsi bwa Samia Suluhu kuva ku ya 29 Ukwakira.”
📰 Also Read This:
Amazina y’abafashwe arimo Frederick Ojiro, Julius Kamau, Vincent Mboya, Lichuma na Shem.
Undi mu baharanira uburenganzira bwa muntu, Geoffrey Mboya, yavuze ko bari ku nyubako ya Ambasade mu rwego rwo kwifatanya n’Abanyatanzania bari mu myigaragambyo. Yagize ati: “Turi hano gushyigikira Abanyatanzania bari guhatana n’ubutegetsi bw’igitugu. Turi mu muryango umwe wa Afurika y’Iburasirazuba, kandi ibibabaho bitugiraho ingaruka twese.”
Ku wa Mbere, KHRC yari yamaze gutangaza ko ishyigikiye imyigaragambyo iteganyijwe muri Tanzania ku ya 9 Ukuboza, inamagana ihohoterwa n’icengezamatwara rigamije gucecekesha rubanda no kugabanya umwanya wa demokarasi mu gihugu. KHRC yavuze ko hari ibikorwa bikoreshwamo ingabo n’abacanshuro b’amahanga, bigamije kwibasira abigaragambya, abayoboke b’amadini n’abaharanira uburenganzira bwa muntu.
Muri Tanzania, umutekano wari wakajijwe bikomeye kuri uyu wa Kabiri, abaturage bagirwa inama yo kuguma mu rugo. Umunyamakuru wa CNN yatangaje ko imihanda minini mu mijyi mikuru nta muntu wagendaga gusa hari abasirikare benshi baharindira.
No muri Kenya, polisi yari yazamuye urwego rw’umutekano ku muhanda wa Taifa i Nairobi, ahari inyubako ya Re-Insurance Plaza icumbikiye Ambasade ya Tanzania, hagaragara inzego nyinshi z’umutekano zari zihari ku buryo bugaragara.
