Mu mujyi wa Kinshasa, umwuka w’ubwoba n’ukutizera ukomeje kwiyongera mu nzego z’umutekano, nyuma y’uko abasirikare bakuru barimo General Franck Ntumba Buamunda na General Major Christian Ndaywel Okura boherejwe muri gereza ya gisirikare ya Ndolo.
Ibi byabaye ku wa 7 Mutarama 2026, nyuma y’amezi menshi bafungiwe mu mabiro y’Inama Nkuru y’Igihugu ishinzwe umutekano (CNS), aho bakorerwaga iperereza mu ibanga.
Gen Franck Ntumba Buamunda, wahoze ari umuyobozi w’ibiro bishinzwe igisirikare mu ngoro ya Perezida wa Repubulika, yafashwe muri Nyakanga 2025. Mu gihe gito cyakurikiyeho, muri Kanama uwo mwaka, Gen Maj Christian Ndaywel Okura wari umaze kuva ku buyobozi bw’urwego rw’ubutasi bwa gisirikare na we yafunzwe.
Icyo gihe, ubutegetsi bwatangaje ko hari iperereza rikomeye rikorwa ku byaha bikomeye bibavugwaho, birimo umugambi wo kugirira nabi Umukuru w’Igihugu.
Koherezwa kw’aba bofisiye muri gereza ya Ndolo bifatwa nk’ikimenyetso gikomeye cy’uko dosiye zabo zigiye kujyanwa mu Rukiko Rukuru rwa gisirikare rwa Kinshasa. Ni intambwe ishobora gusiga ingaruka zikomeye, haba ku mibereho yabo ndetse no ku isura rusange y’imiyoborere y’igisirikare cya Repubulika Iharanira Demokarasi ya Congo.
Amakuru ava mu nzego z’umutekano agaragaza ko aba basirikare atari bo bonyine bari muri iyi gereza ya gisirikare. Hari n’abandi bofisiye bakuru baraye boherejwe i Ndolo, barimo Brigadier General Benjamin Katende Batubadila, Brigadier General Antoine Longondjo Lobandi, Colonel Jules Boele Bagolome na Major Jean-Lambert Embole Ngondili.
Ibi byatumye benshi bibaza niba hatariho igikorwa cyagutse cyo gusukura inzego z’igisirikare cyangwa se gucecekesha abakekwaho kutavuga rumwe n’ubutegetsi buriho.
Ibyaha bashinjwa birakomeye kandi byibasira umusingi w’umutekano w’igihugu. Birimo kugambanira igihugu binyuze mu guha amakuru y’ubutasi amahanga, gukwirakwiza amakuru y’ibihuha bigamije guhungabanya inzego za Leta, kutubahiriza amabwiriza y’ababakuriye ndetse no kugerageza kwica Umukuru w’Igihugu.
Gusa, kugeza ubu, nta bimenyetso bifatika byashyizwe ahagaragara mu ruhame bigaragaza neza uko ibyo byaha byakozwe.
Mu gihe aba bofisiye boherezwa muri gereza, General Christian Tshiwewe Songesha wahoze ari Umugaba Mukuru w’ingabo za RDC, akaba n’umujyanama wa Perezida Félix Tshisekedi mu bya gisirikare, we aracyafungiwe muri kasho ya CNS.
Uyu musirikare ukomeye mu ngabo za RDC yavuzwe cyane mu itangazamakuru, ashinjwa kuba yaragize uruhare mu mugambi wo gushaka kwica Perezida Tshisekedi.
Umunyamabanga Mukuru w’ishyaka UDPS riri ku butegetsi, Augustin Kabuya, aherutse gutangaza ko Gen Tshiwewe yemeye ibi byaha, amagambo yatumye impaka zirushaho gukara, cyane cyane mu bakurikiranira hafi politiki n’umutekano bya RDC.
Gusa hari abasesenguzi bagaragaza impungenge ku buryo izi dosiye ziri gukorwamo. Impuguke mu bya gisirikare, Jean-Jacques Wondo, wanabaye umujyanama mu mavugurura y’urwego rushinzwe iperereza rya RDC, avuga ko benshi mu bofisiye bakuru bafungiwe i Kinshasa bashobora kuba barengana. Yemeza ko ifungwa ryabo ridashingiye ku bimenyetso bifatika, ahubwo rishobora kuba rifitanye isano n’ubwumvikane buke n’abari ku butegetsi.
Wondo agaragaza ko hari abasirikare bashinjwe umugambi wo kugirira nabi Perezida Tshisekedi, nyamara bakaba batigeze bahabwa amahirwe yo kwisobanura mu mucyo. Mu bo avuga ko bashobora kuba barengana harimo General Freddy Kalume, General Major Frank Ngama Lebe na General Dieudonné Mutupeke Kiamata.
Ibi byose bituma ikibazo cy’imiyoborere y’igisirikare cya RDC kirushaho kugarukwaho. Abasesenguzi bamwe babona ko ubutegetsi buri kugerageza kwirinda ibishobora kugihungabanya, mu gihe abandi babifata nk’uburyo bwo gukuraho abo butizera no kubambura burundu ijambo mu nzego zifata ibyemezo.
Mu gihe amaso yose ahanzwe ku Rukiko Rukuru rwa gisirikare rwa Kinshasa, benshi bategereje kureba niba izi manza zizakorwa mu mucyo no mu bwisanzure, cyangwa niba zizaba indi ntambwe iganisha ku kurushaho gucamo ibice igisirikare cya RDC no kongera umwuka w’ubwoba mu nzego z’umutekano.
Icyizere cy’ubutabera n’umutekano kiracyari ikibazo gikomeye mu gihugu gikomeje guhura n’ibibazo by’umutekano n’ubwumvikane buke mu nzego zacyo.
