Intara ya Nord-Kivu na Sud-Kivu muri Repubulika Iharanira Demokarasi ya Congo zatangiye ubufatanye bushya bugamije guteza imbere ubukungu, kunoza imiyoborere no kongera ibikorwa remezo byafasha abaturage b’izo ntara zombi.
Guverineri wa Sud-Kivu Patrick Busu Bwa Ngwi hamwe na guverineri wa Nord-Kivu Bahati Musanga Erasto bashyize umukono kuri ubu bufatanye bushya, bwavuzwe nk’intambwe ikomeye igamije gushyira izi ntara ku murongo w’iterambere n’imiyoborere igamije inyungu z’abaturage.
Mu bikorwa by’ingenzi bigize ubu bufatanye harimo gutangiza imirimo yo kubaka ikiraro cya Buganga giherereye i Minova, kizafasha guhuza mu buryo bworoshye intara za Nord-Kivu na Sud-Kivu. Iki kiraro gifatwa nk’igikorwa remezo gikomeye kizafasha koroshya urujya n’uruza rw’abantu n’ibicuruzwa hagati y’izo ntara zombi.
Abayobozi b’izi ntara bagaragaje ko iki gikorwa kizafasha guteza imbere ubucuruzi, koroshya ubwikorezi no kongera ubufatanye mu by’ubukungu hagati y’abaturage batuye mu bice bitandukanye by’izi ntara.
Bashimangiye kandi ko uyu mushinga ugaragaza isura nshya y’imiyoborere iri gushyirwa imbere n’ubuyobozi bwa AFC/M23, igamije guteza imbere ibikorwa remezo, gukomeza ubufatanye hagati y’intara no guteza imbere ubukungu bw’akarere.
Uretse koroshya ingendo n’ubwikorezi, biteganyijwe ko uyu mushinga uzatanga amahirwe mashya ku baturage, arimo koroherezwa kugera ku masoko, guteza imbere ubucuruzi no kuzamura imibereho y’abaturage bo mu bice bya Minova n’ahandi.
Ibi bikorwa bishobora kuba intangiriro y’indi mishinga ihuriweho n’intara zitandukanye muri Repubulika Iharanira Demokarasi ya Congo, igamije kongera imikoranire no guteza imbere ubukungu bw’uturere dutandukanye tw’igihugu.
