Abashinzwe umutekano muri Kenya batangaje ko bavumbuye kandi bagakuraho neza ibisasu byari byatezwe hafi ya Nyatike Bridge mu Ntara ya Migori, umunsi umwe gusa mbere y’uko Perezida William Ruto ateganya kugirira uruzinduko muri ako gace.
Raporo ya polisi ivuga ko itsinda rishinzwe umutekano wa Perezida (presidential advance security team), rigizwe n’inzego zitandukanye, ryakuye ku ruhande rw’ikiraro ibice birindwi by’ibisasu bya gel explosives hamwe n’umugozi wifashishwa mu guturika (detonating cord) ureshya na metero ebyiri. Aho byari byahishwe ni hafi y’ikiraro, nko ku ntera ya kilometero enye uvuye kuri sitasiyo ya polisi ya Macalder.
Iki gikorwa cyakozwe ku bufatanye bw’inzego zirimo Polisi ya Kenya, Urwego rw’Ubugenzacyaha (DCI), ishami rishinzwe kurwanya iterabwoba (Anti-Terrorism Police Unit) ndetse n’ishami rishinzwe gusenya ibisasu (Bomb Disposal Unit).
📰 Also Read This:
Polisi yatangaje ko ibyo bisasu byakuweho nta muntu n’umwe bigiriye nabi, ibintu byashimishije abaturage ndetse bigaragaza ubushobozi bw’inzego z’umutekano.
Abagenzacyaha basobanuye ko umwobo ibyo bisasu byari byatezwemo bigaragara ko wacukuwe hifashishijwe imashini ikoresha umwuka (compressor), kandi ibimenyetso by’ibanze bigaragaza ko bishobora kuba byaratezwe aho hashize amezi menshi.
Aho byari biherereye harapimwe, ibisasu bifatwa n’ishami rishinzwe kubisesengura mu buryo bwa gihanga i Migori, mu rwego rwo kumenya ubwoko bwabyo n’aho byaturutse.
Inzego z’umutekano zatangaje ko iperereza rigikomeje kugira ngo hamenyekane impamvu nyamukuru yateye itezwa ry’ibi bisasu, cyane ko Perezida Ruto yari ateganyijwe kunyura kuri Nyatike Bridge mu ruzinduko rwe rwari ruteganyijwe ku wa Gatatu.
Iyi nkuru yeteje impungenge ku mutekano w’abayobozi n’abaturage muri rusange, ariko inzego zibishinzwe zemeza ko umutekano wakajijwe kandi ko hatagize igihungabana ku ngendo zemewe.
