Mu gihe imiryango myinshi ku Isi iba yitegura kwizihiza iminsi mikuru ya Noheli n’Ubunani mu byishimo n’umutekano, abaturage bo mu gace ka Kisimba, muri gurupema ya Kisimba, teritwari ya Walikale mu Ntara ya Kivu y’Amajyaruguru, bo bari mu bwoba n’agahinda gakomeye batewe n’igitutu bashyizweho n’inyeshyamba zibarizwa mu mutwe wa NDC Rénové.
Amakuru aturuka muri ako gace avuga ko uwo mutwe wategetse ku mugaragaro ko buri muhana ugomba gutanga ihene imwe, ku ngufu, nk’icyiswe “inkunga yihariye” igomba gufasha izo nyeshyamba kwizihiza iminsi mikuru ya Noheli n’Ubunani.
Serivisi za Digital za Afrovera
Dufasha business n’imishinga kugaragara online bin yuze muri serivisi za digital zinoze kandi ku giciro gito cyane.
- ✔ Gukora Website za business & companies
- ✔ Posters & Graphic Design
- ✔ Website Hosting & Domain
- ✔ Gufungura YouTube Channels za business
Iri tegeko ryashyizweho nta biganiro byabanje n’abaturage, nta busobanuro buhagije, kandi nta burenganzira bwo kubijuririra.
Abaturage bavuga ko iri tegeko ryatangajwe mu buryo bw’igitugu, riherekejwe n’iterabwoba rikomeye.
Abataratanga ihene basabwa bagaragarijwe ko bashobora guhura n’ibihano bikomeye birimo gukubitwa, kwamburwa imitungo, gufungwa mu buryo butemewe n’amategeko, ndetse n’ibindi bikorwa by’ihohoterwa.
Bamwe mu baturage bavuga ko ihene atari itungo rito muri ako gace, kuko ari imwe mu nkingi z’ingenzi zifasha imiryango kubona amafaranga, kwivuza no kwishyura amashuri y’abana. Gutanga ihene ku ngufu muri iki gihe gikomeye cy’ubukene bifatwa nk’igikorwa kibasubiza inyuma mu mibereho yabo.
Iki gikorwa gishya cya NDC Rénové kije gikurikira amateka maremare y’imitwe yitwaje intwaro ikoresha abaturage nk’inkunga y’intambara, ibashyiraho imisoro itemewe n’amategeko, haba mu mafaranga, mu biribwa cyangwa mu matungo.
Abasesenguzi b’umutekano bavuga ko iyi ari imwe mu nzira zikoreshwa n’iyo mitwe mu kwitunga, mu gihe inzego za Leta zidafite ubushobozi bwo kugenzura ibice byinshi byo mu byaro bya Kivu y’Amajyaruguru.
Ikirenze kuri ibyo, amakuru akomeje kuvugwa agaragaza ko izi nyeshyamba zivugwaho kuba zarahawe intwaro n’inkunga n’ubutegetsi bwa Perezida Félix Tshisekedi, binyuze mu mikoranire ishingiye ku mitwe ya Wazalendo.
Imiryango myinshi iharanira uburenganzira bwa muntu igaragaza ko gutanga intwaro ku mitwe itari iya Leta, idafite umurongo uhamye wo kubazwa inshingano, byongera ibyago byo gukorera abasivili ihohoterwa, aho iyo mitwe ishobora kwisanzura mu bikorwa by’iterabwoba idatinya ingaruka.
Akarere ka Walikale kamaze imyaka myinshi kabaye indiri y’intambara n’imitwe myinshi yitwaje intwaro, birimo FDLR, NDC n’indi mitwe ya Mai-Mai.
Ibi byagize ingaruka zikomeye ku baturage, aho ubuhinzi bwahungabanye, ubukungu bwarasenyutse, naho abaturage benshi bahitamo guhunga ibyabo bakaba impunzi imbere mu gihugu.
Abasesenguzi bemeza ko iri tegeko ryo gutanga ihene ku ngufu rishobora gutuma abaturage barushaho kwiyumvamo ko batewe n’impande zose, haba imitwe yitwaje intwaro ibahohotera ku mugaragaro, cyangwa inzego za Leta zisa n’izirebera, ntizigire icyo zikora mu kubarinda.
Mu gihe iminsi mikuru ya Noheli n’Ubunani yegereje, abaturage bo muri Kisimba bavuga ko aho kwitegura kuyizihiza, bari mu bwoba bwo kumenya niba bazarokoka ihohoterwa rishobora kubageraho, cyangwa niba bazatakaza amatungo yabo make bari bafite.
Abaturage basaba byihuse ko ubutegetsi bwa Leta ya Repubulika ya Demokarasi ya Congo, bufatanyije n’imiryango mpuzamahanga irimo MONUSCO, bwagira icyo bukora kugira ngo harindwe abasivili, hagahagarikwa ibikorwa by’imitwe yitwaje intwaro ikomeje kwifashisha abaturage nk’isoko y’umutungo n’ibikoresho by’intambara.
