Ihagarikwa rya General Sylvain Ekenge ku mirimo ye nk’Umuvugizi w’Ingabo za Repubulika ya Demokarasi ya Congo (FARDC) ryashimishije bamwe ariko rinatuma abandi bifuza ko hafatwa ingamba zikomeye kurushaho ku magambo ye yavugishije benshi mu gihugu.
Umuryango urwanya imvugo zibiba urwango, ACLDH, watangaje ko guhagarika Gen. Ekenge gusa bidahagije. Mu itangazo ryashyizwe ahagaragara ku wa Mbere, itariki ya 29 Ukuboza 2025, umuvugizi w’uyu muryango, Gloire Manesa, yavuze ko amagambo ya Gen. Ekenge “yashubije inyuma ibikorwa byo kwimakaza amahoro n’ubumwe mu gihugu,” aho yibasiraga Abatutsi mu kiganiro yatanze ku RTNC ku itariki ya 27 Ukuboza.
Manesa yagize ati: “Guhagarika uyu muyobozi ku kazi ntibihagije. Dukeneye ko hafatwa ibihano by’intangarugero, kandi niba bikwiye, hakurikiranwe mu nkiko kugira ngo ibitekerezo nk’ibi bitazongera gukwirakwira mu gihugu cyacu.”
Icyo kirego cy’uyu muryango cyagaragaje ko imvugo nk’iyo ya Gen. Ekenge ishobora gukurura urwango no kongera umutekano mucye mu burasirazuba bwa RDC, ahakunze kuba imvururu n’imirwano.
ACLDH yahamagariranye abayobozi ba gisivili n’abasirikare gukorera hamwe mu kurwanya imvugo zose zibiba urwango, ndetse banasaba ko itangazamakuru, abavuga rikijyana, n’abaturage bose bagira uruhare mu kwimakaza amahoro arambye, ubutabera, n’ubumwe bw’abaturage.
Kuri uyu wa Mbere ushize, Gen. Major Sylvain Ekenge yahagaritswe ku mirimo ye n’Umugaba Mukuru wa FARDC.
Umunyamakuru wari wamuhaye ijambo kuri Radio na Televiziyo by’igihugu nawe yahagaritswe ku kazi.
Iki cyemezo cyaje nyuma y’uko Gen. Ekenge yavuze amagambo yavugishije benshi ko abantu bashaka abagore b’Abatutsikazi bagomba “kwitonda,” ibintu byafashwe nk’ivangura rikomeye rishingiye ku moko.
Abasesengura iby’umutekano muri RDC bavuga ko amagambo nk’aya adasanzwe kandi ashobora kugira ingaruka zikomeye ku mibanire y’amoko, cyane cyane mu gihe igihugu gihanganye n’imvururu n’intambara z’ubwoko bwinshi mu burasirazuba.
Mu itangazo rye, ACLDH yongeye gushimangira ko iharanira ko abantu bose bafatwa kimwe n’amoko yose yubahirizwa, kandi ko ingamba zose zigamije gukumira ivangura n’urwango zigomba gushyirwa mu bikorwa.
Manesa yongeyeho ati: “Nta muntu n’umwe uhejwe n’amategeko, haba umusirikare cyangwa umunyamakuru, iyo magambo ye arimo gusenya ubumwe bw’igihugu.”
Abaturage benshi ku mbuga nkoranyambaga bagaragaje impungenge, bavuga ko gukurikirana Gen. Ekenge mu nkiko ari cyo cyemezo cyonyine cyashimangira ko RDC itazongera kubona abayobozi bakoresha urwango ku mugaragaro. Bamwe bavuga ko ibi bigomba gutanga isomo ku bandi bayobozi batandukanye ku bijyanye n’imvugo bakoresha.
Mu gihe Gen. Ekenge ahagaritswe, bamwe mu baturage n’abasesengura ibya politiki baribaza niba RDC izakomeza gukaza amategeko ajyanye no guhana imvugo z’ivangura n’imvugo zishobora guteza umutekano mucye.
Uyu munsi, itangazamakuru ry’igihugu n’amahanga ririmo gukurikirana cyane ibikurikira iki cyemezo. Abantu benshi bafite amatsiko, aho bategereje kureba niba ibihano bikomeye bizafatwa cyangwa niba hazabaho ibindi bikorwa bikomeye byo gukumira imvugo zibiba urwango mu gisirikare n’ahandi hose mu gihugu.
