Mu rugendo rwo kunoza serivisi z’ubuvuzi no kongera ireme ry’isuzuma ry’indwara, Ikigo cy’Igihugu gishinzwe Ubuzima Rusange (INSP) cya Repubulika Iharanira Demokarasi ya Congo, ku bufatanye na Roche Diagnostics, cyasojwe amahugurwa yo kongerera ubumenyi abakozi n’abafatanyabikorwa ba laboratwari, yiswe “Alignement de la vision”.
Aya mahugurwa yabaye mu minsi itatu, kuva tariki ya 10 kugeza ku ya 12 Ukuboza 2025, agamije gushyiraho icyerekezo gihuriweho ku bijyanye na sisiteme y’igihugu ishinzwe gusuzuma indwara. Abayitabiriye bashyize hamwe, baganira ku mbogamizi ziri mu rwego rwa laboratwari n’uburyo zakemurwa mu buryo burambye.
Mu gusoza aya mahugurwa, hashyizweho kandi hatorwa gahunda ngenderwaho ya strategiya, izifashishwa mu gushyira mu bikorwa ibikorwa by’ingenzi bigamije kunoza imicungire n’imikorere ya laboratwari ku rwego rw’igihugu hose.
📰 Also Read This:
Impuguke n’abafatanyabikorwa bagaragaje ko hakenewe sisiteme imwe ihuriweho, ikora neza kandi icungwa ku rwego rw’igihugu, ihuza laboratwari, isuzuma ry’indwara n’imicungire yo kohereza no kwakira ingero (échantillons). Iyo sisiteme igomba kuba ifite ingengo y’imari ihagije, ikoresha ikoranabuhanga rigezweho, igafashwa n’abakozi babifitiye ubumenyi, kandi ikagerwaho n’abaturage bose b’igihugu.
Mu ijambo rye, Umuyobozi Mukuru Wungirije wa INSP, Mukenyi Badibanga, yashimye intambwe yatewe muri aya mahugurwa, anizeza ko ibyifuzo n’inama byatanzwe bizashyirwa mu bikorwa. Yavuze ko by’umwihariko hazibandwa ku gushyira serivisi z’isuzuma mu ikoranabuhanga (digitalisation), gushyiraho uburyo bw’imiyoborere ishingiye ku bufatanye, kongerera laboratwari ubushobozi mu bya tekiniki, kunoza ubwikorezi bw’ingero, guhugura abakozi ndetse no gucunga neza imyanda iva mu buvuzi.
Ku ruhande rwe, Johan Descombes, Umuyobozi Mukuru wa Roche Diagnostics mu bihugu bivuga Igifaransa muri Afurika, yongeye kwemeza ko ikigo ayoboye cyiteguye gukomeza gufasha RDC muri uru rugendo rwo kunoza sisiteme y’isuzuma ry’indwara.
Yagize ati: “Muri Roche, dufite intego yo gutanga ibisubizo bishya kandi byizewe mu rwego rw’ubuzima. Twishimira kuba umufatanyabikorwa w’INSP muri iyi gahunda igamije gushyiraho icyerekezo cya strategiya. Turifuza gukorana bya hafi na laboratwari zo muri RDC kugira ngo tunoze isuzuma n’uburyo abarwayi bitabwaho.”
Aya mahugurwa yahuje inzobere n’abafatanyabikorwa baturutse mu nzego za Leta n’izigenga, ndetse n’abaterankunga n’abafatanyabikorwa mu bya tekiniki mu rwego rw’ubuzima rusange, bikaba byafashwe nk’intambwe ikomeye iganisha ku sisiteme y’ubuzima igezweho, ikorera abaturage kandi yizewe muri RDC.
