Teritwari ya Walikale, mu Ntara ya Kivu y’Amajyaruguru, yongeye kwisanga mu mutekano muke ubwo abaturage b’imidugudu itanu bahungaga n’imitwe yitwaje intwaro irimo FDLR isanzwe ifatanya n’ingabo z’ihuriro rya Leta kurwanya AFC/M23.
Ku wa mbere, abaturage bo mu midugudu ya Bonde la Afia, Tuonane, Bunyamwimbwa, Kifuruka na Kilambo, bavuye mu ngo zabo berekeza mu mujyi wa Busurungi bashaka umutekano w’ibanze.
Amakuru yizewe aturuka ku bayobozi b’inzego z’ibanze avuga ko FDLR, bayobowe n’uwiyita Gen Mudayongwa, yagabye igitero gikomeye ku mudugudu wa Tuonane ku Cyumweru, atwika inzu zose, ahitana abasivili babiri, abandi benshi barahunga. Umurongo w’ingenzi w’iki gitero ni uguhindura ako gace icyicaro cyo guhangana na AFC/M23.
Abaturage bavuze ko batinya ubwicanyi bwa FDLR, cyane cyane bibutse ibyabaye mu myaka yashize i Busurungi, Chambucha, Mianga na Malembe mu 2012, aho abantu benshi bishwe, inzu ziratwikwa, n’ubwoba bukaba bwari bwinshi.
📰 Also Read This:
Umwe mu baturage bahunze yagize ati: “Twahunze inzu zacu, tugana i Busurungi dushaka umutekano. Ariko umutima uracyari mu bwoba kubera ibyo twabonye mu myaka ishize. FDLR iracyadutera ubwoba cyane.”
Nyuma y’igitero cya FDLR, Mai Mai Kifuafua, umwe mu mutwe w’ihuriro rya Wazalendo rishyigikiwe na Leta, yihutiye gutabara abaturage no guhagarika ibikorwa by’iterabwoba bya FDLR. Imirwano yakurikiyeho yamaze amasaha menshi mu misozi ikikije Tuonane no mu nzira zijya Mishipo.
Abayobozi bavuze ko abantu 10 bahitanywe n’iyi mirwano: abasivili babiri bishwe na FDLR, abarwanyi babiri ba Mai Mai Kifuafua, n’abarwanyi batandatu ba FDLR. Mai Mai Kifuafua yemeje ko yirukanye FDLR by’agateganyo, ariko yagaragaje impungenge ko bashobora kongera kwigaragaza mu buryo butunguranye.
Amakuru avuga ko FDLR yari imaze amezi abiri yinjira mu gace ka Mishipo, nyuma yo kuva muri Masisi, aho yari ihanganye n’ingabo z’igihugu n’indi mitwe yitwaje intwaro. Uyu mutwe w’iterabwoba wagiye ushaka guhindura aka gace icyicaro cyawo gishya cyo gutegura ibikorwa by’ubugizi bwa nabi.
Abaturage bavuze ko n’ubwo FDLR yabaye yirukanywe by’agateganyo, ubwoba bukiri bwinshi. Inzu zabo zose zaratwitswe, imyaka bahinze yarangiritse, kandi nta nzira yoroshye yo gusubira mu ngo zabo. Abenshi bavuze ko batagira icyizere cyo kongera kwiyubaka, cyane ko bafite abana bato n’abagore bababaye kubera ubwo buhunzi.
Umwe mu bahunze yagize ati: “Turashaka gusubira mu midugudu yacu, ariko dutinya ko abo barwanyi bashobora kongera kutubangamira. Dukeneye ko Leta itwereka ko ishobora kuturinda burundu.”
