Trump avuga ko Amerika iri imbere mu ntambara na Iran, ariko abanyamerika benshi barayamagana

Perezida wa Leta Zunze Ubumwe za Amerika, Donald Trump, yatangaje kumugaragaro ko ingabo ze ziri guhangana na Irani ndetse anemeza ko biri kugenda neza kurusha uko yabitekerezaga .Mu ijambo rye, yavuze ko ingabo za Amerika zigeze ku ntera ishimishije kandi ko ibikorwa biri gukorwa biri imbere y’igihe cyari cyarateganyijwe, nubwo atigeze atangaza igihe nyacyo iyi ntambara ishobora kurangirira.

Trump yashimangiye ko ubuyobozi bwe bukomeje gukurikiranira hafi uko ibikorwa bya gisirikare bigenda, avuga ko intego ari ukurinda inyungu za Amerika n’abo bafatanyabikorwa bayo mu karere. Icyakora, yakomeje kwirinda gutangaza igihe ntarengwa cy’ihagarikwa ry’ibi bikorwa, agaragaza ko biterwa n’uko ibintu bihinduka ku rugamba.

Ibi bije mu gihe ubushakashatsi bushya bwakozwe bwerekana ko Abanyamerika benshi batishimiye icyemezo cyo kujya mu ntambara na Iran. Uwo mubare ugaragaza ko hafi abantu batandatu muri buri icumi batemera icyemezo cya leta yabo cyo gukoresha ingufu za gisirikare muri icyo gihugu, bigaragaza impungenge ku ngaruka z’iyi ntambara ku mutekano, ubukungu n’uruhare rwa Amerika ku rwego mpuzamahanga.

Abasesenguzi ba politiki bavuga ko uku kutishimira iyi ntambara bishobora gushyira igitutu ku buyobozi bwa Trump, cyane cyane niba ibikorwa bya gisirikare bikomeje kumara igihe kirekire cyangwa bikagira ingaruka zikomeye ku basirikare n’ubukungu bw’igihugu. Ibi kandi bishobora kugira uruhare ku cyerekezo cya politiki y’Amerika n’imibanire yayo n’ibindi bihugu byo mu burasirazuba bwo hagati.

Nubwo ubuyobozi bwa Amerika buvuga ko buri kugera ku ntego zabwo, impaka zikomeje kwiyongera haba imbere mu gihugu no ku rwego mpuzamahanga, mu gihe isi ikomeje gukurikiranira hafi uko iyi ntambara ishobora guhindura uburinganire bw’imbaraga mu karere no ku isi muri rusange.