Umutwe wa MRDP–Twirwaneho watangaje impuruza ku byo uvuga ko ari imyiteguro y’ibitero bikomeje gukorwa n’ihuriro ry’ingabo zirwana ku ruhande rwa Leta ya Repubulika Iharanira Demokarasi ya Congo, bigamije kwibasira abasivili b’Abanyamulenge batuye mu misozi miremire y’Intara ya Kivu y’Amajyepfo.
Umuhuzabikorwa wa MRDP–Twirwaneho, Colonel Kamasa Ndakize Welcome, yatangaje ko mu minsi ishize hiyongereye cyane ibikorwa bya gisirikare mu bice bya Fizi, Itombwe na Uvira, avuga ko bigaragaza umugambi wo kugaba ibitero ku baturage bo muri utu duce.
Yasobanuye ko iyo myiteguro igaragarira mu kohereza ku bwinshi ingabo z’u Burundi (FDNB) zifatanyije na FARDC, imitwe ya Wazalendo, abarwanyi ba FDLR ndetse n’abacanshuro b’abazungu. Nk’uko abivuga, intego y’iri huriro ni ugutera abasivili b’Abanyamulenge bo mu Minembwe no mu nkengero zaho, hagamijwe kubirukana ku butaka bwabo no kubwiyitirira ku ngufu.
Mu itangazo yasohoye ku wa Gatandatu tariki ya 24 Mutarama, Colonel Kamasa yavuze ko Twirwaneho ifite amakuru yizewe agaragaza ko ingabo z’u Burundi zamaze koherezwa mu gace ka Mutambala muri Teritwari ya Fizi, by’umwihariko ahitwa Kichula, Itota na Kananda, aho bivugwa ko ziri gutegura ibitero bihuriweho na FARDC bigamije Abanyamulenge bo mu Minembwe.
Yagize ati: “Uko kohereza izi ngabo biteje impungenge zikomeye ku basivili b’Abanyamulenge, kandi biri mu mugambi mugari wo kubakura ku butaka bwabo burundu.”
Twirwaneho ivuga ko ihuriro ry’ingabo za Leta ya RDC ryongeye gusubira mu misozi miremire nyuma y’uko AFC/M23 ivanye ingabo zayo mu mujyi wa Uvira, mu gihe hari hemejwe ko uwo mujyi wagombaga koherezwamo ingabo zidafite uruhande zibogamiyeho. Icyakora, uyu mutwe uvuga ko iyo ngingo itubahirijwe, bituma habaho icyuho cy’umutekano cyahise gikoreshwa na FARDC, Wazalendo ndetse n’ingabo z’u Burundi zinjiye muri Uvira zinyuze ku mupaka wa Gatumba, zivugwa ko zambaye impuzankano ya Congo mu rwego rwo guhisha uruhare rwazo.
Uyu mutwe wanagaragaje ko ku wa Kane tariki ya 23 Mutarama, ingabo ziri ku ruhande rwa Leta zagabye ibitero mu duce twa Rugezi na Mukoko zikoresheje drone z’intambara, ibitero byakomerekeyemo abaturage bane bo mu mudugudu wa Mikenke. Twirwaneho ivuga ko ibi bitero bigize ukwica amategeko mpuzamahanga agenga ubutabazi.
Mu gusoza, MRDP–Twirwaneho yongeye kunenga umuryango mpuzamahanga ku bwo gukomeza kudafata ingamba ku ihohoterwa rikomeje kuvugwa ko rikorerwa abasivili b’Abanyamulenge, risaba ko hakorwa ibishoboka byose hagamijwe kubarinda no guhagarika ibikorwa bya gisirikare bigirwamo ingaruka n’abaturage b’inzirakarengane.
