Umuhanzi w’icyamamare muri Uganda, Eddy Kenzo, akaba n’Umujyanama wa Perezida Yoweri Museveni mu by’ubuhanzi, yagaragaje impungenge ku magambo aherutse gutangazwa na Bobi Wine, avuga ko igihugu cya Uganda kiri “kumarwa n’amaraso”. Kenzo yibajije uburyo Bobi Wine ashobora kuvuga ko igihugu kiri mu bibazo bikomeye mu gihe nawe yateye imbere kandi yarakuriye umutungo ukomeye muri icyo gihugu.
Mu magambo ye, Eddy Kenzo yagize ati: “Ni gute umuntu ashobora kwiyubakira umutungo ukomeye mu gihe avuga ko igihugu kiri gupfa? Niba Uganda koko iri mu maraso, ni gute washoboye gutera imbere muri iyo sisiteme?” Aya magambo yayavuze asubiza amagambo ya Bobi Wine akunze kugaragaza ko ubutegetsi buriho butuma igihugu gisubira inyuma.
Si ubwa mbere Eddy Kenzo anenga Bobi Wine ku bijyanye na politiki n’imibereho y’igihugu. Aba bahanzi bombi bagiye bagirana impaka zikomeye, cyane ku ruhare rw’abahanzi muri politiki, ubuyobozi bw’igihugu, n’uruhare rwabo mu guhindura imibereho y’abaturage.
Bobi Wine, wabaye umuhanzi akinjira muri politiki atavuga rumwe n’ubutegetsi, akunze kugaragaza ibibazo birimo ubukene, ihohoterwa rya politiki n’ibura ry’ubwisanzure. Ku rundi ruhande, Eddy Kenzo ashimangira ko igihugu gifite amahirwe yo gutera imbere, cyane binyuze mu rubyiruko n’uruganda rw’ubuhanzi.
Izi mpaka zikomeje gukurura ibitekerezo bitandukanye mu bafana, abakurikiranira hafi politiki n’imyidagaduro, ndetse no mu baturage muri rusange. Hari abashyigikiye Eddy Kenzo bavuga ko amagambo ya Bobi Wine ahora agaragaza isura mbi y’igihugu, mu gihe abandi bavuga ko kuba umuntu umwe yarakize bidakuraho ibibazo rusange.
