Mu nama y’Igihugu y’Umushyikirano yabaye ku nshuro ya 20, yabereye muri Kigali Convention Centre, Paul Kagame yatanze ijambo rikomeye ryibanze ku bibazo by’umutekano w’igihugu, imvugo zibiba urwango zituruka mu karere, n’inshingano z’abayobozi mu kurengera inyungu z’abaturage.
Perezida Kagame yagarutse ku bibazo by’umutekano bishingiye ku mutwe w’Interahamwe n’ingengabitekerezo ya Jenoside bikigaragara mu Burasirazuba bwa Repubulika Iharanira Demokarasi ya Congo, ashimangira ko ari byo shingiro ry’ukutumvikana hagati y’u Rwanda n’igihugu cy’abaturanyi, aho guhora u Rwanda rushinjwa gushaka umutungo kamere wa Congo.
Ati: “Iyo tuza kuba turi muri Congo gushaka amabuye y’agaciro, twari kuba dukize inshuro ijana kurusha uko turi uyu munsi. Ariko ikibazo nyacyo ni umutekano w’igihugu cyacu, utewe n’imitwe ifite ingengabitekerezo ya Jenoside ikorera hariya.” Yongeyeho ko kubaza umubare w’izo nyeshyamba ari ukwirengagiza ikibazo nyamukuru, kuko n’iyo haba hasigaye bake, iyo ngengabitekerezo ishobora kwimurirwa mu rubyiruko igakomeza guteza umutekano muke.
Perezida Kagame yanenze imvugo zibiba urwango zivugirwa mu ruhame n’abayobozi bamwe bo mu karere, avuga ko amagambo ahamagarira urugomo n’intambara agira ingaruka zikomeye ku mutekano w’u Rwanda, kuko yumvwa n’abantu benshi bashobora kuyashyira mu bikorwa. Yabajije ati: “Izo mvugo zibiba urwango muzibara mute mu mibare, mu gihe zigira ingaruka ku buzima n’umutekano w’abantu?”
Ku bijyanye n’inshingano z’abayobozi, Perezida Kagame yashimangiye ko umuyobozi wese wemeye inshingano agomba kubazwa uko yakoresheje umutungo w’igihugu n’icyo wagejeje ku baturage. Yamaganye imishinga icungwa nabi n’ikorwa idateguwe neza kubera kudakorana kw’inzego, asaba ko hakorwa ubugenzuzi buhoraho n’uburyozwe ku bayobozi barangarana abaturage.
Ati: “Gufata inshingano si uguhabwa umwanya gusa, ni ukwemera kubazwa no kubihanirwa igihe wananiwe gusohoza ibyo wahawe.” Yasabye ko umuco wo kubazwa no kubihanirwa ukomeza gushimangirwa aho amakosa agaragaye.
Mu gusoza ijambo rye, Perezida Kagame yibukije Abanyarwanda ko bose bafite inkomoko imwe kandi ko nta mpamvu yo kwemera amacakubiri cyangwa imyumvire ishingiye ku rwango. Yasabye ko Umushyikirano uba umwanya wo kuvoma amasomo y’amateka, gushyira hamwe imbaraga za buri wese no gukomeza kubaka igihugu gishingiye ku bumwe, umutekano n’inshingano.
Iryo jambo rya Perezida Kagame ryagaragaje icyerekezo gikomeye cy’u Rwanda mu kurengera umutekano warwo, gusaba ukuri n’inshingano ku buyobozi, no guhangana n’ibibazo by’akarere bitagamije inyungu z’igihugu, ahubwo bigamije amahoro n’iterambere rirambye.
