Urukiko Rukuru rwa Kenya rukorera i Milimani mu mujyi wa Nairobi rwafashe icyemezo cyo guhagarika by’agateganyo ishyirwa mu bikorwa rya sisitemu itanga amande z’ibinyabiziga mu buryo bw’ikoranabuhanga, yari yashyizweho n’Ikigo gishinzwe umutekano wo mu muhanda.
Icyo cyemezo cyafashwe ku wa 12 Werurwe 2026, nyuma y’ikirego cyatanzwe n’umuryango Sheria Mtaani ku bufatanye na Shadrack Wambui, barega National Transport and Safety Authority (NTSA), State Law Office, ndetse n’abandi bireba.
Umucamanza Justice Bahati Mwamuye wasuzumye ibyari bikubiye mu kirego n’inyandiko zashyikirijwe urukiko, yemeje ko inzego zose zirebwa n’iki kibazo zihagarika ako kanya gutanga, gusaba cyangwa gushyira mu bikorwa amande z’ibinyabiziga zitangwa hakoreshejwe sisitemu zikorera ku ikoranabuhanga cyangwa izifata ibyemezo mu buryo bwikora (automated systems).
Urukiko rwanategetse ko ishyirwa mu bikorwa rya gahunda ya Instant Traffic Fines Management System rihagarikwa kugeza igihe uru rubanza ruzasuzumirwa mu buryo bwimbitse n’urukiko rugafata icyemezo cya nyuma.
Muri ayo mabwiriza kandi, urukiko rwategetse ko banki KCB Bank Kenya yinjizwa muri uru rubanza nk’uruhande rufite inyungu muri uru rubanza (Interested Party).
Abatanze ikirego basabwe kugeza ku baregwa bose kopi z’ikirego, inyandiko z’ubusabe ndetse n’icyemezo cy’urukiko, haba mu nyandiko zisanzwe no mu buryo bw’ikoranabuhanga, bitarenze 13 Werurwe 2026, ndetse bagatanga icyemezo cyerekana ko ibyo byakozwe (Affidavit of Service).
Ku ruhande rw’abaregwa n’uruhande rufite inyungu muri uru rubanza, basabwe kugaragaza mu rukiko no gutanga ibisubizo byabo ku kirego bitarenze 20 Werurwe 2026. Naho abatanze ikirego bashobora gutanga ibisobanuro by’inyongera (rejoinder) bitarenze 27 Werurwe 2026, igihe bibaye ngombwa.
Urukiko rwemeje ko uru rubanza ruzongera kuvugwa ku wa 9 Mata 2026, hagamijwe kugenzura niba amabwiriza yatanzwe yubahirijwe, ndetse no gutanga indi mirongo ngenderwaho izafasha ko uru rubanza rusuzumwa kandi rugakemurwa mu gihe gito gishoboka.
Icyemezo cyafashwe n’urukiko bivuze ko sisitemu ya amende z’ibinyabiziga zitangwa mu buryo bw’ikoranabuhanga muri Kenya ihagaritswe by’agateganyo, mu gihe hagitegerejwe umwanzuro wa nyuma w’urukiko kuri iki kibazo.
