Timu ya Taifa ya Tanzania, Taifa Stars, imehitimisha safari yake kwenye michuano ya Kombe la Mataifa ya Afrika (AFCON) 2025 baada ya kupokea kipigo cha bao 1-0 kutoka kwa wenyeji Morocco katika mchezo wa hatua ya 16 bora uliochezwa kwenye Uwanja wa Prince Moulay Abdellah, mjini Rabat.
Katika mchezo huo uliokuwa na ushindani mkubwa, Taifa Stars ilionesha nidhamu na kujituma kwa kiwango cha juu, hata hivyo bao pekee la Morocco lilitosha kuwapa tiketi ya kusonga mbele hadi hatua ya robo fainali. Matokeo hayo yamehitimisha rasmi ushiriki wa Tanzania katika mashindano ya AFCON 2025.
Kwa ushindi huo, Morocco sasa itakutana katika robo fainali na mshindi wa pambano jingine la hatua ya 16 bora kati ya Afrika Kusini na Cameroon, ambao walitarajiwa kuumana katika mchezo uliofuata.
Licha ya kuaga mashindano, Taifa Stars imeacha taswira ya matumaini kwa mashabiki wake, ikionesha maendeleo na ushindani mkubwa dhidi ya vigogo wa soka barani Afrika—jambo linaloashiria mustakabali mzuri wa soka la Tanzania endapo jitihada na maandalizi yataendelezwa.
