Ikipe ya Arsenal yerekanye ko ari iki pe ikwiye gutwara iki gikombe itsinda Tottenham Hotspur ibitego 4-1 mu mukino w’umunsi wa 28 wa Premier League, intsinzi yagaruye icyizere mu rugendo rwo guhatanira igikombe.
Uyu mukino wabereye kuri Stade ya Tottenham Hotspur kuri iki Cyumweru saa kumi n’ebyiri n’igice. Arsenal yawinjiyemo ifite igitutu cyo gushaka amanota atatu, nyuma yo kunganya imikino ibiri ya shampiyona iheruka.
Ku munota wa 32, Eberechi Eze ni we watangije ibirori atsinda igitego cya mbere, ariko Tottenham ntiyacitse intege kuko nyuma y’iminota ibiri gusa Randal Kolo Muani yahise yishyura, amakipe ajya kuruhuka anganya 1-1.
Icyakora igice cya kabiri cyatangiranye imbaraga ku ruhande rwa Arsenal. Ku munota wa 47, Viktor Gyökeres yatsinze igitego cya kabiri ku mupira mwiza yari ahawe na Jurrien Timber. Nyuma yaho, ku munota wa 61, Eze yatsinze igitego cya gatatu, kiba n’icya gatanu amaze gutsinda Tottenham mu mikino ibiri gusa kuva yagera muri Arsenal.
Mu minota y’inyongera (90+4), Gyökeres yongeye kunyeganyeza inshundura atsinda icya kane, umukino urangira Arsenal itsinze Tottenham 4-1 mu buryo bugaragaza itandukaniro rikomeye hagati y’amakipe yombi.
Nyuma y’iyi ntsinzi, Arsenal yakomeje kuyobora urutonde n’amanota 61, irusha Manchester City ya kabiri amanota atanu kandi igifite umukino w’ikirarane. Tottenham yo ikomeje kugorwa n’umusaruro, iri ku mwanya wa 16 n’amanota 29.
