kuri uyu wa Gatandatu tariki ya 27 Mutarama, Umutwe wa M23 waramukiye mu mirwano ikomeye n’abarwanyi ba “wazalendo” barwana ku ruhande rw’ingabo za leta ya Congo (FARDC), n’ihuriro ry’Ingabo za Guverinoma ya Repubulika Iharanira Demokarasi ya Congo.
M23 yatangaje ko kuva mu gitondo cya kare, ihuriro ry’ingabo za guverinoma n’abo bafatanyije bagabye ibitero ku birindiro bya M23 ku muhanda Karuba- Sake.
M23 kandi biciye mu muvugizi wayo, Lawrence Kanyuka, iravuga ko ihuriro ry’Ingabo za Leta ari ryo ryateye ibirindiro byayo bitandukanye.
Ati: “Ingabo zihuje z’ubutegetsi bwa Kinshasa zirimo FARDC, FDLR, abacancuro, inyeshyamba, Ingabo z’u Burundi ndetse n’iza SADC mu kuza kwica abasivile nk’ibisanzwe, muri iki gitondo batangije ibitero bihuriweho ku birindiro byacu bitandukanye”.
Ibirindiro M23 ivuga ko byatewe ni ibiherereye mu duce twa Karuba, Kingi, Karenga, Negenero, Mbuhi n’ibice bihakikije.
Kanyuka avuga ko n’ubwo umutwe wa M23 watewe abarwanyi b’uyu mutwe “bari kwirwanaho kinyamwuga”, ndetse uyu mutwe washimangiye ko utazihanganira ko ingabo za Leta ya Congo zikomeza gukorera ubwicanyi mu duce igenzura.
Ni mu gihe abo ku ruhande rwa leta bavuga ko M23 ari yo yagabye ibitero ku birindiro bya Wazalendo na FARDC i Mbuhi na Bukama.
N’ubwo buri ruhande rushinja urwo bahanganye ko arirwo rwatangije imirwano, M23 yatangaje ko iza kwirwanaho mu buryo bwa kinyamwuga.
Hagati aho, i Butare ku musozi wa Murambi na Busumba, naho imirwano yasubukuwe, humvikanye intwaro ziremereye n’izoroheje guhera saa kumi n’imwe za mu gitondo, nk’uko amakuru aturuka muri ako karere abitangaza.
Imirwano yo kuri uyu wa Gatandatu ije ikurikira indi karahabutaka yari imaze iminsi ibiri ibera mu mujyi wa Mweso.
Ni imirwano yasize ku wa Kane w’iki cyumweru hishwe abaturage barenga 20 bo muri uriya mujyi uherereye muri Teritwari ya Masisi.
