Umunyamideli n’umukinnyi wa filime wo muri Tanzania, Frida Kajala, yongeye kuvugisha benshi ku mbuga nkoranyambaga no mu bitangazamakuru, nyuma yo kuvuga amagambo akomeye agaragaza uko amarangamutima ye kuri Harmonize akiri ku rwego rwo hejuru, nubwo umubano wabo wanyuze mu bihe bigoye.
Mu kiganiro yagiranye n’ikinyamakuru Rick Media, Kajala yagarutse ku mateka y’urukundo rwe n’icyamamare mu muziki, Harmonize, agaragaza ko atigeze yicuza kumuha umwanya mu buzima bwe, kuko hari byinshi byiza yamukoreye byahinduye ubuzima bwe n’ubw’umwana we.
Kajala yavuze ko yamenyanye na Harmonize akiri umusore uhanganye no kwiyubaka mu muziki, bakagenda bubaka umubano wabo buhoro buhoro mu bihe by’ibigeragezo n’ibyishimo. Yibutse cyane igihe yahuye n’ikibazo gikomeye cy’ubukungu, aho yaburaga amafaranga yo kwishyura ishuri ry’umukobwa we, Paula, wari mu mwaka wa kabiri w’amashuri yisumbuye.
Ati: “Harmonize ndamukunda. Aho kugira ngo mwange, nabura ubuzima bitewe n’ibyo yankoreye. Hari igihe Paula yoherejwe mu rugo kuko nari ntabashije kubona amafaranga y’ishuri. Nari mu bihe bitoroshye cyane. Naramubwiye uko bimeze, nubwo na we icyo gihe yari akirwana no kwiyubaka. Yagiye kuri banki ahita ampa ayo mafaranga aho twari duhagaze ku muhanda.”
Aya magambo Kajala avuga ko ayafata nk’ikimenyetso cy’ubuntu n’urukundo nyakuri, ashimangira ko Harmonize yahoraga yitanga kugira ngo uburezi bw’umwana we butazigera buhagarara, n’iyo byamusaba kwiyibagirwa ibye.
Ibi bije bikurikira amashusho aherutse gukwirakwira ku mbuga nkoranyambaga agaragaza Kajala na Harmonize bari kumwe mu kabyiniro, bagaragara bishimanye cyane mbere y’uko Harmonize ajya ku rubyiniro. Ibyo byatumye benshi bongera kwibaza niba urukundo rwabo rwarasubukuwe, nyuma y’imyaka hafi itatu bari baratandukanye ku mugaragaro.
Nubwo hari abafana babo bishimiye kongera kubabona bari kumwe, abandi basabye kwitonda, bibutsa amateka y’umubano wabo waranzwe n’urukundo rwinshi, gutandukana inshuro nyinshi no kongera gusubirana mu ruhame, ku buryo bamwe batangiye kuwugerageranya n’inkinamico idashira.
Kugeza ubu, nta n’umwe muri bo uratangaza ku mugaragaro niba koko bongeye gusubirana, ariko amagambo ya Frida Kajala yamaze kongera kwatsa imbuga nkoranyambaga no kongera gushyira urukundo rwabo mu mitwe y’abantu benshi.
