Umwe mu ndwanyi za Wazalendo wari uzwi cyane mu bikorwa byo kwica no gusenyera Abanyamulenge yaraye apfiriye ku rugamba mu ntara ya Kivu y’Amajyaruguru, mu mirwano ihanganishije M23 n’ihuriro ry’Ingabo zirwana ku ruhande rwa Guverinoma ya Repubulika Iharanira Demokarasi ya Congo.
Uyu wishwe ni Colonel Kasongo Bidwange Rupete, uvuka muri Localité ya Mukumba/Masango, Grupema ya Bijombo, teritware ya Uvira, mu ntara ya Kivu y’Amajy’epfo.
Col.Kasongo, avuka mu bwoko bw’Apfulero, yahoze muri Maï Maï, izwi mu kwica abasivile b’Abanyamulenge, gusahura Inka zabo no gutwika ingo z’abaturage bo mu misozi miremire yo ku Ndondo ya Bijombo.
Zimwe mu ngo bivugwa ko yasenye mu myaka yatambutse hariho ingo z’Abanyabyinshi n’Abasegege, bo ku Gihuha na Mbundamo, mu bice bya Gatanga. Harimo kandi ingo zitandukanye zo mu Rurambo ndetse no mu Cyohagati.
Amakuru aturuka ku mirongo y’imbere ku rugamba avuga ko Col.Rupete yaguye mu mirwano yabereye mu nkengero za Sake, muri Grupema ya Kamuronza, teritware ya Masisi.
Ni nyuma yuko yari yaragiye guha umusada ingabo za Republika Iharanira Demokarasi ya Congo, avuye mu misozi ya Uvira, nyuma y’uko imitwe y’inyeshamba ya Maï Maï, yibumbiye mu cyiswe Wazalendo.
Iyi ndwanyi yapfuye mu gihe bivugwa ko Wazalendo, batavuga rumwe na Monusco, SADC, aho bacitsemo ibice, dore ko hari n’abandi barwanyi b’uyu mutwe baheruka kugwa mu mutego wa M23, mugace ka Murambi, bakaza gutangaza ko Monusco yabagambaniye.
Hari andi makuru avuga ko ingabo za SADC zanze kongera kujya mu mirwano ziri kumwe na Wazalendo, nk’uko byatangajwe na bamwe mu barwanyi ba Wazalendo.
